Les xornaes culturales 'Outono en Bual' de l'Asociación Xuvenil Mezá continúen medrando

|

L’Asociación Xuvenil Mezá entama la sétima edición de les sos xornaes culturales con un programa percompletu. Esposiciones, talleres, conciertos, conferencies y gastronomía protagonicen un 'Outono en Bual' en medría que va desendolcase'l vienres y el sábadu nesta población del occidente.

La inauguración d’esti “mini-festival autoxestionao de música, gastronomía, arte y lliteratura”, como indica la organización, va celebrase mañana a les 19 hores na Casa Cultura con una presentación de tolos actos previstos y de les dos esposiciones que van tar a disposición del públicu estos díes: ‘Paisaxes postindustriales: úa mirada al patrimonio esqueicido’, d’Andrés Rodríguez Monteavaro, y ‘Torbón de llume / Огненный дождь’, de Sveta Poutilina. Darréu, va actuar el grupu de folk gallegu Carricobanda, que debuta n’Asturies y que tien anguaño ente los sos componentes a Roi Sampedro, que fora músicu de Mezá.

L’actividá del sábadu va principiar al meudía con un taller de cestes tradicionales de bringa a cargu de Verónica Álvarez, de Lláscara Xeoturismu y Desarrollu Rural, na que “vei enseñar al público cómo se fain as tradicionales paxas de toda a vida con texido vexetal”. Yá de tarde, a les 16 hores, Ramsés Ilesias va protagonizar un taller de baille tradicional de la zona Eo-Navia, eventu nel que pa participar ye necesario contar con delles nociones de baille. El turnu de les conferencies ta previstu pa les 17 hores, cuando Llorián García va falar de “Gaitas ouguidas, gaitas escuitadas. Celtismo, disciplina corporal y redefinición da escuita nel fenómeno das bandas de gaitas asturianas”, una charra dirixida a músicos tradicionales y al públicu que quiera conocer la filosofía d’una banda de gaites.

A les 21 hores ta programada una cena nel institutu de Bual na que se van poder prebar productos del país y del llugar, cola opción d’escoyer ente un menú omnívoru o vexetariuanu. Los vales pa esta comida popular van tar a la venta mientres toles xornaes a un preciu de 10 euros. Pa zarrar l’actividá, va celebrase un conciertu nel Helenias da Frieira nel que van tomar parte Os Pampirolos, el grupu de gaitas de Grandas que repite nel Outono en Bua; Tuenda, el tríu formáu por Pepín de Muñalén, Xosé Antón Fernández ‘Ambás’ y Elías García; el grupu gallegu Chotokoeu, que vien de dar una xira per Europa; y Misiva, banda de punk-rock que ta anguaño llevando la so propuesta musical n’asturianu y castellanu a dellos puntos del Estáu.

Cola intención de dar vida al occidente del país

Esti completu programa del VII Outono en Bual ayuda a afitar la idea cola que nacieron estes xornaes culturales nel 2008 col nome de 'Outono Cultural'. “El fin d’este proyecto é motivar y dar un pouco de vida al occidente asturiano y, sobre todo, espertar as mentes d'aquellos que pasan el día delantre da televisión y da cultura institucional. Tamén, este evento quer ser un acto de reivindicación das dúas llinguas tradicionales d'Asturias, el asturiano y el gallego-asturiano, y por esta razón faise tresversal el uso d’ellas nas xornadas, así como a posta en valor da cultura del país y da súa evolución nel siglo XXI, llonxe d’esteriotipos y de clichés impostos por ningún dogma oficial”, apunten dende l’Asociación Xuvenil Mezá.

Toles actividaes son de baldre y la organización pon a disposición de los asistentes un aparcamientu pa caravanes y furgonetes, y una zona d’acampada atechada y con duches pa la nueche del sábadu. Otra manera, la organización entama la rifa d’una cesta con productos del país que va sortiase’l domingu. Ésta cuenta con productos de les empreses Embutidos Pico de Fiel, Queixeiría d’Abredo, Queisos Ca Sanchu, Cosmética Terraveya, Cerveza Caleya, Sidra L’Allume, Artesanía Verdenaz, discos y llibros en gallego-asturiano, una fotografía d’Andrés Rodríguez Monteavaro y güevos de Pitasana, ente otros productos.

AdxuntuTamañu
Image icon Cartelu del VII Outono en Bual.jpg52.29 KB
Contador Estadistiques