Victor Manuel y Ana Belén, apueste del Gobiernu pa los actos del Día d’Asturies.

Víctor Manuel y Ana Belén van ser l'actuación grande que va traer anguañio'l Gobiernu asturianu a los actos institucionales del Día d'Asturies, que van celebrase en Pravia. El grupu de glam-rock Babylon Chat y un homenaxe a los diez años de carrera del grupu de folk Tejedor, nel que van participar dellos artistes convidaos van completar los actos.

Daniel Gutiérrez Granda y Carlos Redondo presentaron ayeri'l programa d'actos oficiales pa esti Día d'Asturies, pal que yá tan pesllaes casique toles actuaciones y actos complementarios. Una feria del discu y del llibru n'asturianu y una esbilla de curtios de realizadores asturianos a cargu del Festival de Cine de Xixón van ser les mayores novedaes nun programa nel que tamién va haber güecu pal tradicional mercau astur, exhibiciones y competiciones de deportes tradicionales y l'actuación de grupos folclóricos y bandes de gaites. FEVE va poner trenes especiales dende Uviéu, Xixón y Avilés p'asistir a los actos, que se celebren cada añu nuna villa asturiana distinta dende 1999 y que lleguen anguaño a Pravia por petición espresa del conceyu.