Víctimes del galipote

Agora que parez que l'aire sopla del sur y dexa que les playes y pedreros del país garren un poco'l fuelgu énte la marea negra, que sigue ehí enfrente y puede volver en cualquier momentu, ye tiempu d'atender pa les otres víctimes del galipote. Nun reclamen perres, nun piden que dimita naide nin tampoco protesten, pero non por ello dexen de ser los páxaros una de les víctimes más perxudicaes del galipote, aparte de facer de señales involuntaries de les manches qu'hai pa la mar. La organización SEO-Birdlife diz que'l Prestige ye'l responsable de la muerte d'ente 10.000 y 15.000 páxaros, y que l'arao podría llegar a estinguise nes zones afectaes pola marea negra

Hasta ayeri, ente los dos centros de recuperación de páxaros petroliaos de L.luarca y Avilés llevaben atendíos cerca de 200 páxaros, los más d'ellos araos y draques, una cantidá importante que da una idega de lo qu'entovía tenemos ehí enfrente y qu'estragó la capacidá de los dos puntos que caltién la Conseyería cola ayuda de voluntarios. La Coordinadora Ornitolóxica d'Asturies y voluntarios tan recuperando tolos páxaros que pueden, pero la fin de la ponte de la constitución va menguar enforma'l númberu de voluntarios que puedan andechar nesti llabor. Casu de qu'alcuentres un páxaru petroliáu, piensa que ties de trabayar rápido pa que l'ave nun muerra de frío. Has de siguir los conseyos que dan nesta páxina, envolvelu con un trapu y guardalu nuna caxa de cartón como pues ver nesti vídeo