Vicente García Oliva gana la quinta edición del Premiu Timón p’autores n’asturianu y gallego-asturiano

El xuráu del V Premiu Timón p’autores n’asturianu y gallego-asturiano decidió esti miércoles concedé-y el gallardón a Vicente García Oliva. El xixonés va recibir el premiu’l 17 de setiembre dientro de los actos de L’Arribada.
 
Esta quinta edición del gallardón, col que l’Asociación Cultural L’Arribada premia la trayeutoria d’escritores n’asturianu y gallego-asturianu nacíos enantes del 1961, recae en García Oliva tres caer en manes de Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009) y Roberto González-Quevedo (2010). El xixonés, nacíu nel añu 1944, ye un escritor integrante de la primer xeneración del Surdimientu y ún de los fundadores de Conceyu Bable en Xixón, amás de miembru de númberu de l’Academia de la Llingua Asturiana, onde dirixe la Coleición Lliteratura Xuvenil.
 
A día de güei forma parte del conseyu de redaición de la revista ‘Lliteratura’ y ta acabante d’espublizar ‘El síndrome de Sherezade’, obra ganadora del XVI Premiu Máximo Fuertes Acevedo d'ensayu n'asturianu. La so trayeutoria destaca pola so dedicación a la lliteratura infantil o xuvenil, xéneru al que dedicó bona parte de la so obra: ‘Les aventures de Xicu y Ventolín’ (1982), ‘La bruxa Pumarina y el Dragón Maragatu’ (1983 y 2004), ‘Xicu y Ventolín en vacaciones’ (1984), ‘Fontenebrosa: El reinu de los Silentes’ (1984 y 1992), ‘Delfina la ballena cantarina’ (1986), ‘Memoria de los Cimeros’ (1986), ‘Diariu d’Enol’ (1988), ‘El mercaderu de tormentes’ (1993), ‘Muerra la Reina de Corazones’ (1996), ‘Eso… de la Mitoloxía Asturiana’ (1998, edición n’asturianu y en castellanu), ‘Los camientos de Deva y Xulián’ (1998), ‘El barco de los locos’ (2004, en castellanu), ‘La fada que nun quixo ser fada’ (2005), ‘¡Alabín, bon, ban…!’ (2006), ‘Relato de las aventuras de Inés Saldaña y de cómo ayudó a Colón a descubrir América’ (2006, en castellanu), ‘Elemental, querida Lisa’ (2007), ‘Garulla. Antoloxía del ritmu’ (2007) y ‘El Club Social d’Altos Vuelos’ (2007).
 
No que respeuta a la lliteratura p’adultos, García Oliva asoleyó obres tamién de gran calidá como ‘L’aire de les castañes’ (1989), ‘El norte’ (1991), ‘Aventura humana y lliteraria al rodiu de don Enrique García Rendueles’ (1992), ‘A simple vista’ (2001), ‘Constelaciones’ (2002) y ‘El ríu soterrañu’ (2003). Too esta trayeutoria fai al xixonés bon merecedor del V Premiu Timón, que consiste nuna pintura cerámica obra del artista Jesús Castañón. El xuráu d’esta edición del premiu tuvo presidíu por Humberto Gonzali y compuestu por Alberto Álvarez Peña, Fernando de la Fuente, Aurora García Rivas y David M. Rivas.