Vicente Álvarez Areces va repetir como candidatu socialista nel 2007

La Federación Socialista Asturiana enfótase nel actual presidente asturianu pa que repita como candidatu electoral nel 2007. Areces va repetir asina como cabeza de cartel de los socialistes asturianos pa la presidencia d'Asturies por tercer vegada dempués de les convocatories del 1999, cuando ganó por mayoría absoluta, y 2003, na que la llista qu'encabezaba llogró una mayoría relativa que llevó a la FSA al actual pautu de gobiernu con IX-BA.

L'otru nome que sonaba como posible alternativa a Areces, el secretariu xeneral de la FSA, Javier Fernández, foi precisamente l'encargáu de dar anuncia de que pidiere a la Comisión Executiva del partíu'l preste p'Areces como candidatu. Fernández conseñó qu'hebo "consensu" nel sen de la Xunta Executiva alredor de la persona d'Areces y aclarió que, anque de mano s'anunciare la elección del candidatu socialista pa setiembre o ochobre, el partíu decidió adelantar el nomamientu del so cabeza de llista electoral pa evitar los posibles bilordios que podríen espardese a lo llargo del mes d'agostu, en cuantes que los otros dos grandes partíos asturianos, PP y IX, yá tienen proclamaos a los sos candidatos nes persones d'Ovidio Sánchez y Jesús Iglesias.

Sobre la posibilidá de que fuere elli'l candidatu a les elecciones, Javier Fernández reconoció que llegó a pensar nello "dende'l puntu de vista políticu y personal" pero esplicó qu'a la fin nun llegó a ofrecese como candidatu a la Comisión Executiva de la FSA en cuantes que-y abultó meyor pal partíu la opción d'Areces. Fernández declaró que "Areces ye un bon candidatu" y qu'esisten "bien de proyectos en marcha y ye xusto que los remate l'actual presidente".

El dirixente socialista esplicó tamién que pa escoyer cabeza de llista nel conceyu d'Uviéu la FSA sacóa l'agrupación uvieina del procxesu de primaries y que va ser la Executiva de l'Agrupación Socialista d'Uviéu la qu'escueya candidatu a l'alcaldía, anque Fernández emponderó a Paloma Sainz como posible candidata.