El domingu fina’l plazu p’apuntase a los VI Cursos d’Asturianu en Xixón d'Iniciativa pol Asturianu

La matrícula p’apuntase a los VI Cursos d’Asturianu en Xixón qu’entama Iniciativa pol Asturianu zárrase esti domingu. Les persones interesaes pueden optar ente dos niveles, l’inicial y l’avanzáu o nivel II, asina como la posibilidá de dar les clases a distancia.

El cursu de nivel inicial, empobináu a persones ensin conocimientos d’asturianu o con nivel baxu de conocencia, va desendolcase los llunes y miércoles n’horariu de 17 a 19 hores nel Conseyu de la Moceda de Xixón, asitiáu na avenida Manuel Llaneza. Los alumnos que lu superen van recibir un diploma de l’Academia de la Llingua Asturiana, entidá reconocida pola Conseyería d’Educación, Cultura y Deporte pa la formación del profesoráu. Mentes, el de nivel II ta orientáu a xente con una conocencia más fonda del idioma, estoye que yá fixeren dalgún cursu enantes, y va celebrase los mesmos díes que l’inicial n’horariu de 19 a 21 hores. Dambos cursos tienen un llargor de 36 hores.

Los interesaos en matriculase a cualesquier de los niveles ha de ponese en contautu cola organización al traviés del corréu electrónicu conceyuasturianu@gmail.com o del teléfonu 615.982.816, yá sía mediante llamada de voz o al traviés de WhatsApp o Telegram. El preciu de los cursos ye de 60 euros –de 50 pa los socios d’Iniciativa pol Asturianu– y inclúi tolos materiales necesarios pa les clases, nes que van utilizase elementos audiovisuales. Amás de cuestiones gramaticales, nelles tamién van tratase temes rellacionaos cola sociollingüística y la cultura d’Asturies. 

Tamién per Internet

Cola intención de facilitar l’aprendizaxe del idioma a aquelles persones que por residencia o trabayu nun pueden dir a les clases presenciales, Inicitiva pol Asturianu ufre la posibilidá de facer los cursos a distancia al traviés d’una plataforma d’enseñu na rede. Hasta’l momentu hai apuntaos alumnos de Barcelona, Bélxica y Arxentina pa esta iniciativa que cuenta cola collaboración del Conceyu Universitariu pol Asturianu (CUPA), l'Academia de la Llingua Asturiana y el Conseyu de Mocedá de Xixón.