Viḷḷapindi celebra esti sábadu la I Muestra de la Sidra

La I Muestra de la Sidra de Viḷḷapindi /Villapendi va atrayer esti sábadu a Turón a un bon númberu d’aficionaos a la bébora tradicional d’Asturies. Los vecinos entamen esti eventu nel que va haber sidra de baldre y un taller d’escanciáu.
 
El Conceyu de Mieres tamién collabora nesta fiesta que ye antesala a la Folixa na Primavera y que naz con intención de continuidá. Al meudía van principiar les actividaes cola apetura de los puestinos y un actu nel qu’autoridaes del Conceyu de Mieres van dar a conocer el programa oficial de la Folixa na Primavera (8, 9 y 10 d’abril).
 
Pa les 13 hores va celebrase la presentación de los ‘viḷḷapindinos’, postre tradicional del llugar que recuperó la bombonería Flor de Cacao, de Mieres, y media hora más tarde, van espichase unes pipes pa que la xente que s’avere a Viḷḷapindi pueda disfrutar de la sidra. Y como non podía ser d’otra forma, tamién habrá comida, a partir de les 14 hores, preparada polos vecinos del pueblu.
 
Yá pela tarde, a les 17 hores, les persones interesaes pueden participar nun taller d’escanciáu que va completase, a les 17.30 hores, con una exhibición d’echadores y una preba de sidra coordinada por Natalia Menéndez, miembru del Conseyu Regulador de la DOP Sidra d’Asturies. Pa finar, tamién habrá sitiu pa la música con una actuación de la Banda de Gaites Mieres del Camín, a les 18 hores.