Vezos Astures y Danzaina dediquen a Cantabria y a Lleón el IV Alcuentru cola Cultura Tradicional

El 12 de payares va tener llugar en Xixón el IV Alcuentru cola Cultura Tradicional, eventu qu’entama Vezos Astures y Danzaina. Nesta ocasión, los organizadores dediquen la xornada a Cantabria, Lleón y, cómo non, a Asturies.
 
L’alcuentru va mantener el mesmu formatu que n’años anteriores. Asina, pela mañana van celebrase delles charres nel Centru Municipal Integráu de Pumarín-Xixón Sur, pa dar pasu pela tarde a los talleres de baille y, yá de nueche, terminar la xornada con una espicha en Trabanco amenizada pol Triu Santos, Varela y Caleya. L’actividá va principiar a les 11 hores con una conferencia d’Aurerio Vélez García, miembru del coleutivu cántabru Brañaflor, que va comentar ‘Apuntes sobre’l traxe femenín na fastera central (la montaña)’, pa llueu continuar la xornada cola participación de los lleoneses Javier Emperador y Carlos Santos, que van tratar sobre ‘La indumentaria tradicional festiva na Maragatería” (12.30 hores).
                    
A les 16.30 hores van dar entamu los talleres de baille, qu’al igual que les charres de pela mañana son gratuites gracies a la collaboración del Conceyu de Xixón y la Fundación Municipal de Cultura, Educación y Universidá Popular de Xixón, con una actividá sobre la xota a cargu de los lleoneses Emperador y Santos. Darréu, a les 17.30 hores, los cántabros de Brañaflor van afondar nel baille a lo suelto y, a les 18.30 hores, va zarrar la xornada Vezos Astures con una muestra de baille tradicional. “Les nueses asociaciones tienen como función principal la difusión de la cultura tradicional y, por ello, entamamos estos alcuentros orientaos a conocer la cultura tradicional de les rexones cercanes a Asturies, que ye mui poco diferentea la nuesa”, señala Raquel Vega, componente de Vezos Astures y Danzaina. Nesta ocasión, Lleón y Cantabria protagonicen los alcuentros, pero n’ediciones anteriores el certame tamién averó la cultura tradicional d’otros territorios, como Galicia y Salamanca.
 
Espicha en Trabanco
 
L’eventu que va pesllar l’Alcuentru cola Cultura Tradicional va ser una espicha nes instalaciones de Trabanco en Llavandera. A les 20.30 hores ta previsto una visita al llagar pa que les persones de fuera del país puedan conocer cómo ye’l procesu d’ellaboración de la nuesa bébora tradicional y, a les 21 hores, caerán los primeros culetes y principiará a salir la comida. Por último, a les 22.30 hores, va tener llugar l’actuación musical de la nueche, cola presencia del Triu Santos, Varela y Caleya.
 
Les persones que quieran disfrutar dafechu de los alcuentros y participar na espicha, han de reservar y pagar enantes del 4 de payares. Pa ello, pueden ponese en contautu cola organización de dos maneres: pel corréu electrónicu alcuentros@vezosastures.com o pel teléfonu 633.471.545. El preciu de la espicha ye de 26 euros por persona.