Vera apunta que González "taba neses cuestiones" del GAL

L'ex secretariu d'Estáu pa la Seguridá, Rafael Vera, aseguró que desearía "fondamente poder esclarar munches coses" sobre'l GAL. Nesi sen, dixo que l'ex presidente del Gobiernu Felipe González "taba neses cuestiones". 

"Pienso que'l presidente taba nestes cuestiones rellacionaes cola gobernabilidá del país", esplicó Vera en declaraciones a la Cadena Cope, recoyíes por Europa Press, al pregunta-y si l'ex xefe del Executivu autorizaba acciones que podríen considerase como terrorismu d'Estáu. 

"Pasaron munches coses", esplicó Vera, qu'aseguró que cuando'l PSOE llegó al poder en 1982 "yá hubiere munchos episodios", con 46 asesinatos, y dempués, "nel 87", fueron a "acabar definitivamente con aquellos episodios tan escuros".
     
González, "El meyor Presidente"
Rafael Vera señaló qu'entiende perfectamente esti debate, aviváu poles recientes palabres de González revelando que mientres la so etapa al frente del Executivu tuvo la ocasión de 'volar' a la cúpula d'ETA y que decidió nun facelo.
  
Vera, que calificó a González como'l "meyor presidente" que tuvo España, confirmó qu'al Gobiernu llegó información sobre una xunta de tola dirección de la banda nel sur de Francia, pese a que precisó que nun foi al traviés de los servicios del Ministeriu del Interior y que desconoz lo qu'asocedió a partir d'ehí.
  
En tou casu, indicó que la opción qu'escoyó González correspondería tanto a les necesidaes y a intereses del Estáu como "a cuestiones morales" y que nesi sen, "tomó la decisión correcta". "Nun tengo muncho que reprocha-y al señor González", calcó.