"Vento d'Outono" novedá editorial na fala del Navia-Eo

La secretaría del Navia-Eo de l'Academia de la llingua Asturiana asoleyó va pocos díes la obra "Vento d'outono" de la que ye autor l'escritor de Tapia Manuel García Galano (1922). El que ye l'autor más veteranu y prolíficu de les lletres eonaviegues entamó la so carrera lliteraria a primeros de los 90 col llibru "mareaxes tapiegos" obra teatral de 1993 tres de la que vieno, nel 2000 "Erguendo'l telón". Amás del teatru, esti escritor tien asoleyao obra narrativo como'l volume de narraciones "Parzamiques" de 1993 y un "Vocabulariu d'A Roda" contribución de gran valir al procesu de recuperación del gallego-asturianu.

Dende que nel añu 1996 echare a andar la revista en fala eonaviega "Entrambasuguas" qu'empobina l'Academia de la Llingua, Manuel García Galano ye ún de los sos collaboradores fixos, con artículos imprescindibles pa conocer a bien de personaxes y llugares populares del occidente astur. Estes collaboraciones pa la revista son precisamente les que se recueyen agora nesti "Vento d'Outono", estoyu de los sos escritos nestos diez años.