El Conceyu de Xixón presentó esti xueves de manera oficial el Festival Arcu Atlánticu, que va desendolcase na ciudá del 21 al 29 de xunetu. Ventisiete asociaciones y entidaes van collaborar na organización d’esta primer edición, dedicada a Portugal.
 
L’Asociación Pelagius, l’Asociación Cultural L’Arribada, el Xardín Botánicu Atlánticu, el Muséu Barjola, l’Asociación Cultural El Garrapiellu, el Grupo de Deporte Rural 6 Conceyos, la Federación de Bolos o’l Teatru Xovellanos son dalgunos d’estos ventisiete coleutivos o entidaes que collaboren nesta primer edición d’esti “festival multidisciplinar que vien a sumar”, según esplicó Carmen Moriyón, alcaldesa de la ciudá. El conceyal d’Educación, Cultura, Mocedá y Festexos, Carlos Rubiera, y impusor del Festival Arcu Atlánticu, repasó na presentación del certame les rellaciones históriques d’Asturies con otros países del Arcu Atlánticu y fixo mención al comerciu de naranxes y llimones esistente ente Xixón y la costa francesa, en concreto Naunnt/Nantes o La Rochelle, documentada nel añu 1.668. Tamién a la merca de salmón salao y cueros curtíos a Éire, o la venta d’acebache a Portugal y d’ablanes a Inglaterra, ente otres rellaciones comerciales.
 
La declaración de soberanía de la Xunta Xeneral nel 1.808 y l’unvíu d’embaxadores a Inglaterra tamién foi nomada por Rubiera, que llamentó que, tres esa época, “Asturies dexara de mirar pal norte y lo fixera pal sur”, dalgo que, según rellató, ta camudando nos últimos tiempos, pa lo que punxo d’exemplu l’Autopista del Mar con Naunnt-Saint-Nazère. “Va munchos años que pasare pola mio cabeza l’entamu d’un festival como ésti”, comentó l’edil, que miró “nel espeyu de Lorient, un festival pequeñu na primer edición” y qu’agora ye una fonte perimportante d’ingresos económicos y turismu pa esta población bretona.
 
Xosé Nel Riesgo, direutor de la Fundación Municipal de Cultura, Educación y Universidá Popular, comentó la demanda histórica del asturianismu cultural d’una cita como ésta pa Xixón, “que recupera asina bona parte de la so identidá marítima”. Tamién destacó la organización “dende la base” del Festival Arcu Atlánticu, recuperando a les asociaciones, como amuesa que ventisiente coleutivos y entidaes collaboren, nes sos estayes, na organización del eventu. Pa zarrar, Riesgo apuntó que’l Conceyu de Xixón va dir anunciando nos díes próximos, ún por ún y con too detalle, tolos bloques temáticos d’un certame qu’axunta música, deporte, arte, gastronomía y lliteratura, y que nesti primer añu va tar dedicáu a Portugal.
 
Les actividaes
 
La mar ye una de les árees temátiques principales del Festival Arcu Atlánticu y les Xornaes de Náutica qu’entama l’Asociación Pelagius na playa d’El Natahoyo va ser ún de los eventos más importantes d’un certame que va repartirse per dellos puntos de la ciudá. Asina nel paséu d’esta sablera urbana van desendolcase esposiciones, conferencies, aules didáutiques, actividaes náutico-deportives y gastronómiques, conciertos y teatru, ente otros. No que respeuta a la lliteratura, l’Asociación Cultural L’Arribada va organizar nel Centru de Cultura Antiguu Institutu, mesmu llugar que va acoyer les Primeres Xornada de Danza Contemporánea con Raigaños, delles actividaes dedicaes a la creación lliteraria portuguesa. Mentes, el Muséu Barjoja va acoyer una esposición d’artistes de delles disciplines que van esponer los sos trabayos venceyaos al ámbitu atlánticu européu.
 
No que respeuta a la cultura tradicional, el Teatru Xovellanos, el Cerru, la playa d’El Natahoyo y la Plaza Mayor van acoyer conciertos, deportes autóctonos y actuaciones de grupos de baille y de bandes de gaites. Ente los nomes confirmaos destaquen los de Hevia, Tejedor, Llan de Cubel, l’irlandés Paddy Keenan o la portugues Manuela Cavado. Otru fechu destacáu va ser el desfile de mazcaraes ibériques previstu peles cais de la ciudá, eventu nel que collabora la entidá Progestur, que tamién entama un mercadín de productos típicos portugueses en Campu Valdés.
 
Mentes, la Oficina de Normalización Llingüística va sacar a la cai una amuesa de la multitú de materiales lliterarios y divulgativos que s’ellaboraren nestos años en llingua asturiana, asina como una esposición temática nel paséu de la sablera d’El Natahoyo. Mentes, el Xardín Botánicu Atlánticu va acoyer otru bloque temáticu venceyáu a la naturaleza nel que va collaborar l’Asociación Cultural El Garrapiellu con xuegos infantiles y, por último, no que respeuta a los deportes, la Federación de Bolos va entamar un tornéu na playa al que tán convidaes toles peñes bolístiques del país.
 
Na semeya, Rubiera, Moriyón y Riesgo nun momentu de la presentación celebrada nel salón de recepciones de la Casa Conceyu.