Venti años d'Asturies.com

|
Asturia

Esti 3 de febreru faense los venti años dende qu’entamamos esti proyectu de comunicación dixital n’asturianu. Güei brindamos colos nuesos llectores por 20 años más informando n'asturianu

Daquella, cuando Internet taba dando los primeros pasos na so popularización, creyimos qu’esta nueva canal yera un mediu perafayaízu pa da-y visibilidá al nuesu idioma y a una visión d'Asturies centrada nos sos intereses y na so identidá.

Pensábemos que por una vegada podíemos nun aportar tarde y iguar un mediu de comunicación profesional y que pudiere sirvir de carta de presentación na rede pal asturianu y d'espeyu pa munchos asturianos y asturianes que nun se víen representaos nos medios tradicionales.

Asina nació Asturia, yá col dominiu www.asturies.com qu'años depués-y daría nome al mediu, poniendo la llingua asturiana na mapa d'un naciente mundu virtual qu'aína se tresformo nuna ferramienta imprescindible y omnipresente.

Lo que nun primer momentu yera una guía de recursos asturianos na rede y un portal informativu selmanal que punxeron en marcha Fernando de la Fuente y David Guardado, convirtióse colos años nuna referencia na rede asturiana pela que pasaron abondos collaboradores y que punxo en marcha una montonera d'esperiencies pioneres contribuyendo a iguar asina un espaciu comunicativu asturianu y n'asturianu que nestos díes tien un futuru tan inciertu como la propia llingua.

Yera un tiempu d'ilusión na que l'apaición de les nueves tecnoloxíes y la creación de medios on-line ufiertaben posibilidaes pa les visiones alternatives, un momentu nel que nacieron otros medios como Les Noticies coles qu'Asturies.com collaboró de forma intensa, un tiempu nel que los medios mayoritarios n'Asturies tovía nun teníen siquiera ediciones dixitales, y un momentu nel que la oficialidá del asturianu paecía menos lloñe, y casi se tascaba coles manes énte la discusión sobre la reforma del estatutu.

A lo llargo d'esti añu vamos celebrar esti aniversariu faciendo alcondanza d'esos venti años con testimonios, reportaxes y delles actividaes coles qu'Asturies.com va facer memoria de lo que yera, ye y quier ser nel futuru, dende un presente nel que les formes de comunicación dixital tán camudando y nel qu'aportamos a la xente que nos sigue dende les redes sociales y los dispositivos móviles.

Gracies a los nuesos llectores que nos dan l'emburrión día tres día pa continuar con esti proyectu qu'esperamos que pueda siguir lo menos otros 20 años más.

Contador Estadistiques