Vega recueye'l premiu de la Tertulia Malory

'Más espeso que l'agua' resultó escoyíu meyor llibru n'asturianu del 2014.

L'actu va celebrase esta tarde, a les 17.30 hores, nun actu públicu que va tener llugar nel pub Tom Malory de L'Entregu, llugar de reunión d'esta tertulia de manera selmanal dende hai 17 años. La obra ganadora d’esta cuarta edición del premiu ye’l conxuntu de cuentos 'Más espeso que l’agua', de la escritora ayerana Consuelo Vega, según decidió'l 26 de xunu'l xuráu compuestu por Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella al entender que se trata de "una magnífica coleición de cuentos qu’algamen con voz sensible, firme y poderosa’l terrén de la maestría narrativa, amosando al llector el delicáu misteriu que s’escuende tres de lo cotidiano, siempre con una prosa esencial, guapa, ensin aditivos. Histories de xente corriente, vides comunes que, gracies a l’habilidá d’una observadora atenta, resulten aventures estraordinaries”

Con esti premiu los sos entamadores quieren prestixar les lletres asturianes, al empar que dar difusión a les obres que, a criteriu del xuráu, sían consideraes los meyores llibros escritos cada añu n'asturianu. N'ediciones anteriores resultaron gallardonaos Xabiero Cayarga, con ‘La neve del cuquiellu’ (2011); Ruma Barbero, con ‘La Chelita’ (2012); y Milio Rodríguez Cueto, con ‘Carne de melandru' (2013). Vega va recibir esta tarde una ilustración d'Alfonso Zapico y una medalla conmemorativa como recompensa.