Vecinos de Mieres y Llangréu reclamen una llinia d'autobús pela minera

Los presidentes de les federaciones d'asociaciones de vecinos de Mieres y Llangréu, Agustín Álvarez Payo y Vicente Gutiérrez Solís, desixeron esti fin de selmana una meyora nes comunicaciones ente dambos conceyos cola puesta en marcha d'una llinia d'autobuses que xuna les comarques del Nalón y el Caudal pela autovía minera.

Según desplicaron los responsables vecinales, l'oxetivu d'esta iniciativa ye "facer más áxiles" los servicios qu'anguañu van per San Tiso y l'altu Santu Miyano, lo que fai que "el viaxe seya eternu", siñaló Álvarez Payo, qu'aseguró, amás, qu'estes llínies nun tan adaptaes a los horarios de los usuarios principales, los estudiantes.

Payo y Solís recordaron que ye perimportante el númberu d'estudiantes qu'acuden tolos díes dende'l Nalón al campus de Barredo, en Mieres, y dende'l Caudal a los centros de nueves teunoloxíes del Nalón, polo qu'amosaron la so convicción de que la nueva llínia pela autovía minera debe ponese en marcha "darréu".

Les federaciones de vecinos van unviar un escritu oficial al Consorciu de Tresportes d'Asturies (CTA) cola propuesta, anque yá hubo contautos previos ente les entidaes vecinales y el consorciu para falar d'esti tema. "Ellos dixéronnos que podía ser una iniciativa positiva", siñalaron los representantes de les asociaciones mierenses y llangreanes que, sicasí, recordaron qu'agora dende'l Consorciu tien que plantegase esta alternativa a la empresa que na actualidá fai el viaxe Llangréu-Mieres, la firma d'autobuses Recollo, pa qu'analice esta posibilidá.

Si la empresa refugara facese cargu d'esta llinia, los vecinos desixen que se saque a concursu esti percorríu, que fadría que'l viaxe ente dambos conceyos durara namás unos 15 minutos. Tanto Payo como Solís esclariaron tamién durante la so intervención qu'esta actuación nun tien por qué suponer la desapaición de los servicios que xunen los conceyos per Santu Miyano o San Tiso ya que "dan serviciu a los pueblos de les zones altes", polo que los responsables vecinales dexaron tamién claro que nel casu de Santu Miyano sedría necesario "ampliar el númberu de viaxes" ya que na actualidad sólo hai dos al día. Dende les federaciones mierense y llangreana esperase qu'esta iniciativa cunte col vistu buenu oficial del Consorciu de Tresportes d'Asturies, anque tamién se fizo un llamamientu pa que dende dambes cases conceyu se sofite de manera esplícita esta reivindicación.