Vecinos de los conceyos afectaos poles llinies d’alta tensión manifiéstense n’Uviéu

Plataformes vecinales y ciudadanos de los conceyos afectaos pola llinia Costa Verde axuntáronse esti martes n’Uviéu pa protestar contra l’alta tensión. Los manifestantes presentaron miles d’alegaciones a la rede proyeutada por REE.
 
La nomada llinia Costa Verde va de Carreño a Xixón y de Xixón a Nava pa xuntase con Soto-Penagos, a la qu’hai que sumar otra que pasaría por Samartín del Rei Aurelio, Llaviana y Bimenes hasta llegar a Nava pa enganchar cola anterior. Seríen delles llinies nueves de 400.000 voltios que tienen un refugu ampliu de los vecinos de los conceyos pelos que van pasar, como demostraron los dos centenares de persones qu’esta mañana percorrieron el trayeutu ente la estación de Renfe y la Delegación de Gobiernu estatal n’Asturies pa entregar miles d’alegaciones y 5.000 firmes contraries a esti trazáu proyectáu por Red Eléctrica de España (REE).
 
Los manifestantes portaben pancartes nes que podía lleese ‘Subestación y alta tensión Non’, ‘No a la línea de alta tensión de REE’, ‘Serín subestación No’ o ‘Tenemos el remediu contra l’alta tensión’, firmaes por dellos coleutivos o plataformes vecinales.   Ente la xente que participó na protesta taba Rafael Palacios, candidatu del Bloque por Asturies-Unidá Nacionalista Asturiana (UNA) a la Xunta Xeneral. Hai que destacar que dalgunos de los manifestantes acudieron depués del actu a la sede d’Hidroeléctrica del Cantábrico pa participar nun actu que consistió nel montaxe d’una torre d’alta tensión na puerta de la empresa y la instalación de dellos cables.
 
Pedro Villanueva, miembru de la Plataforma Bimenes Contra l’Alta Tensión, señaló que les llinies d’alta tensión reciben el refugu vecinal porque suponen un “impautu grave allá per onde pasa”, tanto en viesques y como en la xente que reside en viviendes cercanes a elles. Villanueva entiende que “Asturias cuenta col doble d’enerxía de la que se consume y de nenguna manera necesita redes eléctriques nueves” y afirma que les llinies d’alta tensión tienen el sofitu del Gobiernu d’Asturies “por motivos económicos”, too ello “a costa de la salú de los habitantes y d’acabar col mediuambiente”.