Vázquez súmase a les dimisiones en Ciudadanos y arrenuncia al escañu

El candidatu de Ciudadanos a la presidencia d’Asturies, Juan Vázquez, arrenunció esti llunes, xornada na que se constituyó la Xunta Xeneral con griesca ente'l PSOE y Podemos, al so escañu. Foi nuna xornada na que dellos cargos de la formación naranxa presentaron la so dimisión, como Toni Roldán o Javier Nart.

Na argumentación de la so decisión, l’ex rector de la Universidá d’Uviéu apuntó al resultáu políticu del 26-M –“ufrí’l mio modestu concursu y los asturianos de manera lexítima prefirieron otres opciones”– que-y impide ser papel decisivu nesta llexislatura, como pretendía –“la natural aspiración de ser actor viose reducida casi a la función d’espectador d’un rumbu que toma Asturies que ye’l que precisamente yo proponía cambiar”–, anque tres d’ello rescampla’l xiru dau hacia la derecha por Ciudadanos: “nesti tiempo variaron tamién les orientaciones de la formación a la que m’incorporé na so candidatura, a la que deseo los mayores ésitos futuros, y nel escenariu que se perfila paezme qu’otros manexaránse mejor y rendirán más que yo”. La imposibilidá de llegar a alcuerdos col socialista Adrián Barbón, ganador de les eleiciones, por mor del pautu de Ciudadanos col PP pa da-y l’alcaldía d’Uviéu a Alfredo Canteli, ye en realidá’l motivu principal de la so salida.

Ésta nun foi la única que se dio ayeri a nivel estatal en Ciudadanos. El primeru foi Toni Roldán, diputáu y voceru d'Economía de Ciudadanos nel Congresu, pola estratexa d'Albert Rivera d'averase más a la derecha y combayar con VOX, al que-y siguió l’eurodiputáu Javier Nart, anque ésti últimu sólo dexa la Executiva del partíu.

Marcos Líndez, presidente de la Xunta Xeneral

Nel Plenu de Constitución de la Xunta Xeneral celebráu ayeri resultó escoyíu como presidente’l socialista Marcelino Marcos Líndez col apoyu de los sos compañeros de partíu y los diputaos de Podemos y Asturies pela Izquierda. La formación morada quedó fuera de la constitución de la Mesa, siendo les vicepresidencies pal PSOE y PP, y les sectetaríes p’Asturies pela Izquierda y Ciudadanos.

Esto indignó a Podemos, que propunxera a Rafael Palacios, llegando a calificar les votaciones como “pautos de despachos” ente les formaciones p’asegurase representación na Mesa de la Xunta Xeneral. Entiende que tres estos supuestos alcuerdos hai la intención d’aumentar los salarios y reducir l’actividá parllamentaria, entamando los plenos cada 15 díes y non cada selmana, como agora.