Vázquez Cárcaba ganó nel FIG de Villaviciosa

El VI Concursu de Gaiteros Solistes 'Memorial José Huerta' zarró cuatro díes d'actividaes alredor del instrumentu.

Fernando Vázquez Cárcaba llevó esta prueba enmarcada nel XI Festival Internacional de la Gaita (FIG), qu'entama la Banda Gaites Villaviciosa-El Gaitero, na que participaron nueve musicos, seis na categoría absoluta. Tres el gaiteru sierense clasificóse como segundu l'ayeranu Xermán Álvarez Castañón, siendo terceru'l so paisanu Diego Longo. En categoría infantil el trunfu foi pa Jaime Álvarez Fernández, de La Fresneda.

El FIG resultó un ésitu de públicu, destacando l'espectáculu 'Pueyes', yá representáu nel Folkomillas Festival, nel que participen la Banda Gaites Villaviciosa-El Gaiteru y el grupu cántabru de folk Naheba, amás de dellos músicos de sonadía. Foi'l sábadu nuna nueche que contó tamién coles actuaciones de Tejedor y Dixebra.

Otra manera, la hostelería de Villaviciosa amosó la so satisfaición pola gran cantidá de xente que s'averó esta fin de selmana a la villa, coincidiendo cola celebración del FIG y de la Fiesta de la Sidra. Los profesionales del sector coinciden en que foi la meyor fin de selmana del branu.