Vanessa Gutiérrez y Antón García aconceyen con González Riaño

L’Academia de la Llingua Asturiana (ALLA) sigue colos contautos con representantes políticos y axentes sociales. Esti vienres Xosé Antón González Riaño va tener un doble alcuentru, primero cola viceconseyera de Cultura, Política Llingüística y Turismu, Ana Vanessa Gutiérrez, que va tar acompañada pol direutor xeneral Antón García, y depués col diputáu nel Congresu por Sumar, Rafael Cofiño.

A les 10 hores ta previstu l'alcuentru na sede de la viceconseyería. La escritora, al igual qu’Adrián Barbón y tolos grupos políticos, yá recibiera un documentu, qu’entovía nun ye de dominiu públicu, coles propuestes de la institución pa facer vidable’l Plan de Normalización previstu pol Gobiernu, del que se falará nesti alcuentru, ente otros munchos asuntos.

Nun va ser l'únicu alcuentru de la xornada, yá que l’axenda de la institución anuncia pa les 13 hores un conceyu con Cofiño. El diputáu de Sumar, que precisamente utilizó la selmana pasada per primer vez con normalidá l’asturianu en comisión nel Congresu, va tener tamién un alcuentru con González Riaño, que-y treslladará la demanda de que’l Gobiernu de coalición ponga enfotu en desatascar la creación de la especialidá docente.

Nestes selmanes últimes pasaron pel llar social de la institución académica Xabel Vegas (Convocatoria por Asturies) y Álvaro Queipo (PP), amás d'Unai Sordo, secretariu xeneral estatal de Comisiones Obreres (CC OO). Recién tamién hebo un conceyu con Lydia Espina na sede de la Conseyería d'Educación.

Na semeya, Gutiérrez la selmana pasada na madrilana Feria Internacional de Turismo (Fitur) pa promocionar el país como destín deportivu.