Van soltar a les primeres víctimes del galipote

Tres mes y mediu de marea negra n'Asturies, yá son cerca de 2.000 los páxaros engalipotiaos que van pasando pelos centros de recuperación d'Avilés y L.luarca pa recibir tratamientu. Anque'l tantu per cientu de baxes ye mui grande, y de tolos que llegaron con vida malpenes queden 200, nun dexa de ser una bona noticia el que los primeros en recuperase vayan soltalos d'equí a dientro poco. Asina se decidió nuna xunta que tuvieron anteayeri na Conseyería de Mediu Ambiente los representantes d'organizaciones ornitolóxiues, responsables de la recuperación de los animales y autoridaes del Principáu. Evidentemente, hai que llevar a los animales lloñe de la marea negra pa poder soltalos, y esti puntu tuvo les sos complicaciones. Anque dellos, como la Coordinadora Ornitolóxica d'Asturies contaben con poder facer la suelta en Bretaña, más allegada a onde críen los páxaros, parez que por imperativos económicos va tener que facese en Portugal, onde yá tan yendo los páxaros que se recuperen en Galicia. Esta decisión tamién respuende a otros criterios, como'l que los animales nun se dañen pol agobiu d'un trayectu de tantos kilómetros.De cualquier manera, la suelta nun va ser masiva, nin con muncho. Nesta primer fase trátaríase d'unos venti páxaros, los más d'ellos araos qu'entovía va haber qu'esperar a que se recuperen dafechu y tengan otra vegada les plumes en condiciones pa que nun-yos cale l'agua nin el frío.Una bona noticia foi que nel conceyu pa decidir el destín de los páxaros, el Conseyeru dio anuncia de que va facese un centru permanente de recuperación de páxaros, como veníen reclamando bien d'organizaciones y particulares. Estos centros, qu'esisten n'otres comunidaes, atienden a los animales enfermos o dañaos qu'apaecen a lo llargo l'añu ensin falta de que pasen desgracies como la del galipote.