“Vamos trabayar pa que’l máximu de partíos lleven la oficialidá nel programa eleutoral y de manera clara”, avanza Llera

El sábadu celebróse nel salón d’actos del Conseyu de la Mocedá de Xixón el IV Congresu y Xunta Xeneral d’Iniciativa pol Asturianu. Iván Llera, presidente del coleutivu dende’l 2019, presentóse a la reeleición, algamando’l sofitu de les socies y socios, p’afrontar con una xunta direutiva anovada y paritaria 3 años más nos que la reforma del Estatutu y la oficialidá van tornar a ocupar l’axenda política.

“El principal oxetivu que nos marcamos pa esti tiempu son les eleiciones muncipales y autonómiques. Vamos trabayar pa que’l máximu de partíu lleven la oficialidá nos sos programes electorales, y de manera clara, pa consiguir esa mayoría necesaria pa poder reformar l’Estatutu d’Autonomía”, asegura’l periodista xixonés, que relevara nel cargu a Inaciu Galán, primer presidente d’Iniciativa pol Asturianu, que va siguir na xunta direutiva como vocal.

Claudia Elena Menéndez pasa a ocupar la vicepresidencia, mentes que Felícites Fernández González ye la secretaria y Jennifer Berrocal, ayalguera. Les distintes vocalíes ocúpenles Andrés Fernández (Universidá), Xilio González (Enseñu), Diego Solís (Formación), Blanca Fernández Quintana (Cultura), Sara Rato (Empresariáu), Alma Hidalgo (Mocedá y Voluntariáu), Pilar Riesco (Asturies Esterior), Xosé Álvarez Álvarez (Internacional), Lluis Fanjul Quelle (Imaxe) y Arantza Margolles (Comunicación).

Paridá y mocedá

De la xunta direutiva nueva Llera rescampla la paridá, “una cuestión que queríamos correxir, yá que consideramos importante visibilizar el trabayu que faen les socies”, y “la incorporación de xente mozo”. Un equipu col qu’afrontar los retos por venir y los previstos nestos trés años próximos de mandatos, ente los que tán, amás de la cuestión de la oficialidá, “consiguir de los partíos compromisos de normalización nos conceyos; el cumplimientu de la toponimia; o la incorporación del asturianu a los informativos de la TPA, cuestión que conocimos la selmana pasada y que nos paez mui importante, polo que solicitamos un aconceyamientu cola direición pa conocer los sos planes”, cita de primeres.

Detrás queden trés años “especiales” pola situación vivida pola pandemia de COVID-19 “que paralizó too”, pero na que Llera valora cuestiones como “la celebración del Día de les Lletres Asturianes nel Centru Asturianu de Madrid, el manifiestu académicu internacional pola oficialidá, el I Congresu Internacional sobre la Llingua Asturiana celebráu Madrid o’l trabayu desendolcáu nos conceyos hasta onde foi posible”.

Na semeya, Llera –terceru pela izquierda–, xunto con parte de la xunta direutiva nueva de la organización. D'izquierda a derecha son Galán, Fernández González, Llera, Hidalgo, Fernández, González y Solís.