"Vamos lluchar por qu'Enagás devuelva los 125 millones que cobró por tener la regasificadora inactiva", afirma EQUO

|
Regasificadora El Musel

El Tribunal Supremu ratifica la illegalidá de la regasificadora d'El Musel, obra que costó 380 millones y qu'ha de valtase. EQUO demanda responsabilidaes polítiques y qu'Enagás devuelva los 125 millones que cobró nesti tiempu.

Los Verdes d'Asturies, formación integrada n'EQUO, denunciara nel so momentu la construcción de la regasificadora d'El Musel por inclumplir dos normatives: el Reglamentu d'Actividaes Molestes, Gafures, Nocives y Peligroses (RAMINP, pol so acrónimu en castellanu), qu'impedía construyir instalaciones d'esti tipu a menos de 2.000 metros de cualquier nucleu habitáu, y una direutiva comunitaria sobre actividaes nocives. Dos normes que nun frenaron a Enagás y l'Estáu, que siguieron col procesu pa construyir la regasificadora.

Nel 2013, el Tribunal Superior de Justicia de Madrid daba la razón a los ecoloxistes, yá que pese a que la construcción de la regasificadora comenzara nel 2008, cuando yá se camudara'l RAMINP pal territoriu asturianu, los trámites pa llevantar la instalación s'iniciaren en 2006, con ésta vixente. Dada la xuridisprudencia afitada por casos similares en Madrid y Navarra, declarábase illegal la regasificadora, sentencia que'l Tribuna Supremu ta acabante de confirmar.

Trés meses

Enagás y l'Estáu tienen agora trés meses pa executar la sentencia, esto ye, valtar la instalación, o pa dar argumentos de que nun ye nociva. "Suponemos que buscarán dalgún tipu de salida llegal a la situación, pero vamos siguir alantre pa que se cumpla la sentencia y, al empar, pidir responsabilidaes polítiques", afirma Ignacio González, covoceru d'EQUO Asturies, que señala tanto al PSOE como al PP.

"Pese a que too empezó col Gobiernu de Zapatero y col PSOE n'Asturies, nel añu 2013, cuando decidieron continuar con esto después de la primer sentencia, taba'l PP nel Gobiernu", esplica González, que tamién confirma que la intención del partíu verde ye lluchar "por qu'Enagás devuelva los 125 millones d'euros que cobró por tener la regasificadora inactiva too esti tiempu", una cantidá que "pagamos toos, porque se reflexa nel recibu del gas".

A esos 125 millones de gastu hai que sumar los más de 380 que costó una construcción "illegal amás d'inútil" que l'añu pasáu coneutóse al gasoducto estatal, lo que significó más gastu. En total más de 500 millones de gastu pa una instalación finada nel 2012 y qu'entovía nun entró en funcionamientu.

Semeya d'EQUO Asturies.

Contador Estadistiques