Valtaes les paneres de Truyés en Corvera

La plataforma Cultural de Corvera, qu'ayeri mesmo denunciare tener conocimientu de que la Conseyería de Cultura tramitaba l'espediente de ruina pa los horros y paneres del conxuntu etnográficu de Truyés, emitió un comunicáu esta mañana llamentando que, a la fin, la empresa promotora de la urbanización "Los Balagares" llevó alantre la destrucción de les dos paneres y los dos horros del llugar. La Plataforma asegura que se trata d'un derribu illegal y que se fexo ensin los permisos que manda la llei pa estos casos.

L'asociación cívica culpa de la perda d'estos elementos etnográficos al Conceyu de Corvera, que diz que foi "cómpliz" de la destrucción de los horros y paneres de Truyés, una culpa qu'espurre tamién a los responsables de la Conseyería de Cultura y a la persona del Xefe de Patrimoniu de la Conseyería. La plataforma asegura amás que, en tou casu, Cultura consintió con que se desmontaren y almacenaren los horros y paneres de Truyés, pero non col esfarraple y destrucción de los mesmos.