Valledor ve al PP más abiertu al diálogu sobre la llingua que’l PSOE

El diputáu d'Izquierda Xunida-Bloque por Asturies-Los Verdes, Francisco Javier García Valledor, afirmó ayeri que'l PP manifiesta "posiciones más abiertes al diálogu" sobre la oficialidá de la llingua na reforma del Estatutu d'Autonomía que'l Partíu Socialista.

El representante autonómicu de la coalición realizó estes declaraciones a l'axencia Europa Press, enantes de la celebración d'un conceyu con Inaciu Iglesias, presidente de la fundación Caveda y Nava, que trabaya pa buscar el consensu ente los grupos parlamentarios asturianos a favor de la oficialidá.

Nel alcuentru, el máximu responsable d'esta entidá entregó al parlamentariu izquierdista documentación recopilada sobre la realidá social de la 'llingua' pal so estudiu previu al alderique estatutariu.

Valledor refirióse a les recientes declaraciones de la presidenta de l'Academia de la Llingua, Ana Cano, nes qu'animaba al PP a "xugar un papel de llideralgu" na busca d'un consensu pola oficialidá. "Lo cierto ye que los fechos nun acompañen, pero nes sos declaraciones faen percibir una diferencia clara col zarramientu per parte de la Federación Socialista Asturiana que raya na paranoya col tema de la llingua asturiana".

Según el diputáu, "nel casu del PP tán tomando posiciones más abiertes al diálogu".

Valledor señaló que la oficialidá "nun conlleva nengún tipu d'obligatoriedá nin imposición", a non ser pa l'alminsitración. "Trátase de reconocer unos derechos llingüísticos", esplicó, enantes de matizar que "se pue graduar en distintos conteníos, ensin implicar imposición". Per otra parte, consideró mui positivu'l conceyu con Caveda y Nava, y valoró'l fechu de que la "sociedá asturiana tea motivada y con propuestes sobre la reforma del estatutu, y sobre'l tratamientu de la llingua asturiana nesa reforma".
Señaló tamién qu'esti tipu d'alcuentros, amás de con Caveda y Nava, IX vien calteniéndolos "con otres entidaes y agrupaciones sociales y culturales". "Naguamos por que con esta reforma se desbloquie esti problema que nunca debió de considerase tal, porque somos la última comunidá autónoma que nun dio una garantía xurídica pa la pervivencia de la llingua propia", afirmó. Recordó tamién qu'esto "supón una falta de derechos pa los asturianos".

El presidente de la fundación Caveda y Nava mostróse "moderadamente optimista" sobre la posibilidá d'algamar la inclusión d'esta midida nel Estatutu d'Autonomía. "Entendemos que se dan una serie de circunstancies que permiten ciertu optimismu", y señaló, y una de les razones y que "l'asturianu nun tien un tratamientu xurídicu apropiáu".

"Como agora hai una reforma del estautu, pensamos que ye'l momentu de tenelu", refiriéndose al mandatu de la Constitución que diz que les lligües vernácules van ser oficiales nos sos territorios. La Fundación aconceyó tamién col PP, de quien destacó la so "receptividá a los sos plantegamientos" y espera facelo pronto col PSOE, pero siempre "tendiendo puentes ente los tres partíos", esclarió Iglesias.