Valledor píde-y a Buendía que dea esplicaciones pol coste d'El Musel

El diputáu d'IX-BA-LV Francisco Javier García Valledor anunció que la coalición que representa rexistró'l pidimientu urxente de que'l conseyeru d'Infraestructures y Política Territorial, Francisco González Buendía, dea esplicaciones enplenu de la Xunta'l Principáu ante les "grandes dudes" xeneraes sobre l'aumentu de coste nes obres d'ampliación del puertu d'El Musel (Xixón).

Al so xuiciu, la comparecencia de Buendía na Comisión d'Infraestrcutures de la XXPA del pasáu llunes, sólo sirvió p'aumentar les dudes y dexó claro que la desviación esconómica pol coste de les obres ye, en realidá, un auténticu "patinazu".

El diputáu d'IX-BA-LV recordó que Buendía confirmó que l'aumentu de coste nes obres del puertu yera d'un 40 por cientu, lo que supón más d 200 millones d'euros. Amás, recordó que Buendía atribuyó a la inmensa mayoría d'esi aumentu de coste a la imposibilidá d'usar les canteres d'Aboñu y de Perecil. Sicasí, Valledor punxo en duda que l'incrementu nos áridos, recurriendo a otres canteres, seya tan "grande".

Dende'l so puntu de vista, anque'l coste d'estraición seya dalgo mayor, nun s'entiende que, uniendo los gastos de tresporte, l'aumentu de coste por cula de los materiales vaya a 178 millones.

Valledor dixo qu'hai muncha documentación, sobre tou la relativa a la qu'acredita la imposibilidá d'usar les canteres, que nun se facilite sobre tou esti asuntu y dixo que la coalición se reserva cualquier otra midida si les esplicaciones nun-yos satisfacen, como'l pidimientu d'una comisión d'investigación.

Esplicó que la UTE axudicataria expunxo la situación en mayu del 2005, ensin esclariar a quién, asina como l'aumentu de coste. "Nesi momentu ya se conocía lo qu'ocurría, cuando dalguién conocía lo que pasaba", dixo. Como elementu "crucial", dixo que, según el conseyeru, ya nesi momentu decidióse aceptar l'aumentu de coste ante'l peligru de paralizar la obra, tou ello col conocimientu de Puertos del Estáu.

"¿Quién toma la decisión en mayu del 2005 d'aceptar l'aumentu de coste?", entrugóse Valledor, que recordó les pallabres de l'alcaldesa de Xixón y miembru del conseyu d'Alministración de l'Autoridá Portuaria, Paz Fernández Felgueroso, quien dixo qu'esa decisión nun se tomó nel conseyu. "Ye importante que'l conseyeru esplique quién toma entós la decisión", apuntó Valledor.

Pela so parte, la conseyera d'Alministraciones Públiques y vocera del Gobiernu, Ana Rosa Migoya, pidió-y al ex conseyeru de Xusticia, Seguridá Pública y Relaciones Esteriores, un "poco más de moderación y responsabilidá nes sos declaraciones".

"Valledor afáyase bien na descalificación permanente, nuna posición irresponsable pa dalguién que formó parte del Executivu y que sabe de les dificultaes y complexidá de determinaes obres, y más d'una como ésta", dixo Migoya, qu'ofreció una rueda prensa pa presentar los presupuestos de la so conseyería.

La vocera del Gobiernu dixo que l'ex conseyeru d'Infraestructures, Política Territoria y Vivienda ya esplicó en sede parlamentaria la información que pue tener como miembru del Conseyu d'Alministración de l'Autoridá Portuaria, porque la obra d'ampliación "nun ye responsabilidá de l'Alministración del Principáu, sinón de Puertos del Estáu y de l'Autoridá Portuaria".

"Esti Gobiernu va comparecer siempre que se solicite, porque nun tien nengún inconveniente en facelo, pero'l conseyeru ya compareció pa dar una esplicación hasta onde él pue conocer sobre les causes que motivaron los sobrecostes", dixo Migoya.