Valledor faló n’asturianu nel Senáu

El conseyeru de Xusticia, Seguridá y Rellaciones Esteriores del Gobiernu asturianu , Francisco Javier García Valledor, convirtióse ayeri nel primer representante de les instituciones asturianes n'emplegar la llingua asturiana nún organismu de representación del Estáu al dar n'asturianu una parte de la presentación del Plan Integral d'Incendios d'Asturies que fexo nel Senáu. El titular de la Conseyería de Xusticia, al que se-y torgó delles vegaes l'usu del asturianu na tribuna de la Xunta Xeneral del Principáu na presente llexislatura, sí que pudo falar n'asturianu nel Senáu, contando con una gran predisposición pa ello por parte de los servicios de la cámara y la mesma mesa del Senáu, qu'aceptó prestosamente la iniciativa del conseyeru de mándase n'asturianu énte los senadores pidiéndo-y copia cola trescripción del testu de la so intervención, que quedó espeyada n'asturianu nel diariu de sesiones.

Con nun ser una llingua oficial, Valledor emplegó l'asturianu na Cámara Alta por atalantar qu'esti yera'l marcu más afayadizu pa facelo, y ello ye que'l Senáu acepta intervenciones en toles llingües cooficiales del estáu. Valledor intervinó nel Senáu a pitición de la Ministra de Mediu Ambiente Cristina Narbona pa presentar el Plan Integral d'Incendios d'Asturies, que ta nesti intre rematando la so fase de redacción p'aprobase a últimos d'esti añu o primeros del 2006 y que va ser el primeru que redacte una comunidá autónoma.