Valledor amenaza con francer el Pautu de Gobiernu

El conseyeru de Xusticia, Seguridá y Rellaciones Esteriores Francisco Javier García Valledor amenazó con francer l'alcuerdu de Gobiernu en casu que'l grupu de la FSA-PSOE nun secunde mañana xueves en Plenu de la Xunta Xeneral les iniciatives del so grupu parlamentariu.

Valledor apuntó a la existencia d'aspectos "inaceptables" nel comportamientu nes últimes selmanes de los sos socios socialistes en Gobiernu y pidió-y a la FSA que recapacitare "d'equí al xueves" porque de lo contrario "nun descartamos nenguna posibilidá respective al pautu".

Dos iniciatives parlamentaries que va presentar IX-BA mañana na Xunta Xeneral amenacen con suponer la francedura del pautu de Gobiernu, la primera rellacionada col corte d'emisión de la señal de la canal de TV TeleAsturias y la segunda col inxerimientu na rede pública del SESPA del Hospital del Oriente d'Asturies con tola so plantiya. L'asuntu de TeleAsturias paez tener especial gravedá y pesu a la hora d'una posible francedura.

Valledor sorrayó que la orde de corte de señal a la emisora de TV crítica col executivu asturianu diose "unilateralmente por parte del PSOE y ensin qu'IX tuviere conocimientu d'ello". Valledor acusó a la FSA-PSOE de baltar col corte de señal a TeleAsturias "elementos básicos" que "tán nel ADN de la nuestra organización política" en referencia a la pluralidá y la llibertá d'espresión.