Valledor adelanta les sos esixencies nel debate presupuestariu

El conseyeru de xusticia Javier García Valledor adelantó ayeri les llinies de lo que va defender el so partíu na negociación de los presupuestos asturianos del 2006. Una xuba llinial del 8% y una actuación na que manden les estayes d'emplegu y vivienda son les condicioes de partida.


Valledor presentó estes valoraciones sobre como habría de ser el presupuestu del 2006 n una rueda de prensa na Feria Internacional de Muestres d'Asturies na que repitió la valoración positiva del pasu del ecuador de la llexislatura y dio anuncia de la esistencia d'un alcuerdu previu sobre como va ser el presupuestu del 2006, que valoró como instrumentu definitivu pa dar cumplimientu al alcuerdu de gobiernu. Pa Valledor les cuentes del 2006 han ser les que dean el reblagu, pasando de la xuba del 7,15% de los presupuestos del 2005 a una xuba del 8%, una diferiemncia que pal conseyeru tien d'empobinase a meyorar les polítiques de llucha contra'l desemplegu y la precariedá llaboral y la vivienda. Un Plan d'Emplegu Xuvenil dedicáu a los titulados de formación profesional y universitarios y el cumplimientu de la promesa de les 15.000 viviendes con dalgún tipu de protección social son les prioridaes, dándo-y gran importancia nesti sentíu al cumplimientu de les 3.500 viviendes previstes en Roces - Xixón.