Valledor abandonó la Xunta Xeneral na intervención de Riopedre

El diputáu d'IX-BA-LV, Francisco Javier García Valledor, decidió ayeri abandonar la sede parlamentaria interrumpiendo'l so turnu d'entrugues y renunciando a la fixación de posiciones del so grupu demientres la comparecencia del conseyeru d'Educación y Ciencia, José Luis Iglesias Riopedre, pa esplicar los presupuestos de la so Conseyería. Valledor consideró un "descaru" que'l conseyeru "presente un presupuestu al Parlamentu que nun recueye lo que se-y esixó que ficiera".

"Pienso qu'esto toca lo intolerable. Con tou'l mio respetu personal, esti grupu dexa agora mesmu de facer entrugues y nun va usar el turnu de fixación de posiciones, porque nunca se vio esta falta de respetu qu'usté tien al parlamentu", dixo Valledor, qu'abondonó darréu la sala.

Les entrugues sobre les partíes destinaes a algamar la gratuidá de los comedores escolares y pa baxar los ingresos mínimos exixíos pa recibir les ayudes a los llibros de testu, asina como la creación de la Llei que regule la educación de cero a tres fueron los motivos que provocaron l'enfrentamientu verbal ente Riopedre y Valledor. Asina, el diputáu d'IX-BA-LV recordó qu'estos tres asuntos alcordárense nel Parlamentu, que ye la "sede de la soberanía".

Riopedre acusó a Valledor d'ignorar la diferencia ente'l poder llexislativu y l'executivu y entrugóse cómo ye posible que se-y exixa una partida presupuestaria pa una llei -la que regula'l ceru a tres- que ta tovía ensin facer. "Nun sé cómo me puen esixir dineru pa ello, Nunca s'oyeron les sos espresiones y la inorancia que les ampara", dixo Riopedre, que s'entrugó cómo la Xunta va obligar a tomar decisiones de Gobiernu. "Nun salgo del asombru", inistió'l conseyeru ante la marcha de Valledor.
Más tarde, nel turnu de fixación de posiciones, el diputáu del grupu parlamentariu del PSOE, Alfonso Rey calificó de "llamentable paranoia que trata de xustificar lo inxustificable", el mou de proceder que cuesta dexar los cargos. Lo que vimos ye intolerable", dixo Rey.

Pela so parte'l PP, al traviés del so diputáu Emilio Rodríguez, calificó de "mentira presupuestaria, que caltienen los mesmos vicios y vacíu de conteníu" la presentación de les cuentes rexonales per parte del conseyeru y añadió que nes mesmes caen les inversiones n'infraestructures n'educación primaria y secundaria. Alertó amás de la, al so xuiciu "desapaición d'escules rurales" nes cuentes y l'escasu avance de la Formación Profesional que da "pasos p'atrás".

"N'educación corrixó dalgunes postures iniciales, pero güei, a la vista d'esti presupuestu, vamos pidi-y que siga corrixendo en munchos aspectos: educación de cero a tres años, billingüismu y la Formación Profesional", dixo'l diputáu del PP, qu'añadió que la rede educativa de cero a tres "ya nun aguanta por un problema, non de recursos sinón de xestión", y volvió a recordar los principales problemes qu'afecten a este rede educativa, según el so partíu.

Rodríguez refirióse tamién a los recientes enfrentamientos ente'l Principáu y el rector de la Universidá y mostró'l so deséu de que nun influyan na marcha de la institución académica.