Valdesoto vivió'l so Domingu de Sidros y Comedies

Numberosu públicu averóse a la parroquia sierense pa disfrutar de la mazcarada llocal.

Na mañana d'ayeri tuvo llugar el Domingu de Sidros y Comedies, cita qu'entama l'Asociación pa la Recuperación de Los Sidros y Les Comedies 'El Cencerru' el domingu siguiente a Reis, como manda la tradición. Los Sidros encargáronse d'anunciar les dos comedies col ruíu de les sos esquiles al blincar, que se representaron al rodiu les 12.30 hores, depués de misa, nel campu la Ilesia.

Los escolinos de Faes protagonizaron 'Salvemos la nuesa tierra', obra de Manuel Pergentino, mentes que los mayores encargáronse de 'La comedia ta en funciones', escrita por José Ramón Oliva. Ésta, como ye habitual, repasó l'actualidá llocal, nacional y internacional de manera irónica y crítica.

X Xornaes de Mazcaraes d'Iviernu

Tres la esitosa xornada del Domigu de Sidros y Comedies, El Cencerru comienza a preparar les X Xornaes de Mazcaraes d'Iviernu, que yá tienen fecha: los díes 10,11 y 12 de marzu.