Valdesoto vive la celebración de les mazcaraes d’iviernu

La tradición recuperada de les mazcaraes d’iviernu torna a Siero. Per trés díes, el conceyu acueye delles actividaes alredor del Desfile de Mazcaraes de Valdesoto del sábadu, nel que van participar grupos de dientro y fuera del país.
 
L’Asociación pa la Recuperación de Los Sidros y Les Comedies ‘El Cencerru’ ye’l coleutivu qu’entama, cola collaboración de l’Asociación Todos Juntos Podemos, les V Xornaes de Mazcaraes d’Iviernu, qu’esti añu tienen como novedá principal la presencia de La Vijanera, de Silió (Cantabria), y Los Guirrios y Madamas, de Llamas de la Ribera (Lleón). Estos dos grupos van encargase d’animar el desfile del sábadu per Valdesoto, nel que tamién van participar les mazcaraes asturianes Os Reises del Valledor (Ayande), Os Reises de Tormaleo (Ibias) y L’aguinaldu de Xedré (Cangas del Narcea), amás de Los Sidros y Les Comedies de Valdesoto. Completen l’eventu’l Coleutivu de Cultura Tradicional Vezos Asturies, el Grupu Teatru Carbayín, la Bandina del Grupu Principáu (Llugones) y los escolinos de la escuela Faes (Valdesoto). La salida ta prevista pa les 17 hores de la Casa Beyao y va finar nel campu fútbol.
 
Mentes, pal meudía del domingu, ta previstu otru desfile, nesta ocasión en Carbayín, dende’l Centru Polivalente El Nozalín hasta la plazoleta de la Barriá de Carbayín, nel que van participar La Vijanera, el Grupu Teatru Carbayín y Los Sidros y Les Comedies. A la llegada, va echase ‘La política ye una comedia’, obra de José Ramón Oliva.
 
L’actividá d’esta fin de selmana complétase güei cola celebración, a partir de les 19.30 hores, de delles charres nel Centru Cultural de Lliceñes, que van tar presentaes pol periodista Iván García Fernández. César Rodríguez, de l’Asociación Cultural Amigos de La Vijanera de Silió, va falar de ‘La fiesta de La Vijanera’, mentes que Naciu’l Rigulón va averar al públicu presente ‘Una mazcarada d’iviernu nel suroccidente asturianu: L’Aguinaldu de Xedré’. Tres estes intervenciones, va haber un alderique colos informantes José María García García ‘Pepito’l de Llorianes’, de Los Sidros; José Ramiro Collar Marrón, de Quei Funsiquin; y Herminia Galán Rodríguez de Quei’l Madreñeru de L’Aguinaldu de Xedré.
 
Dende la organización, conviden a tolos asturianos y asturianes a participar nos eventos programaos pa la fin de selmana y a “envistise de la forma tradicional” pal desfile. “Les persones que s’averen a Valdesoto van poder ver a les mazcaraes más tradicionales y ancestrales. Trátase d’un desfile con munchu colloríu, munchu soníu y munchu ruíu onde participen mazcaraes impresionales”, afirma Pablo Canal Rodríguez, d’El Cencerru, que destaca la presencia de dos grupos de fuera d’Asturies y la importancia que van garrar esti añu los neños y neñes nél. Asina los alumnos de la escuela Faes van interpretar a la llegada al campu fútbol la comedia ‘La ruina’.