Valdepares prepárase pa una edición nueva de la Festa da Gaita

L’área recreativa d’As Pedreiras, en Valdepares, va ser sede’l domingu 8 de xunetu de la decimosesta Festa da Gaita. Esta folixa homenaxea a los gaiteros del occidente que yá nun tan presentes y ye puntu d’alcuentru de los actuales.
 
La tamién nomada XVI Xornada de Gaiteiros Tradicionales del Occidente de Asturias ye “una fiesta onde recordamos a todos los gaiteros del occidente d’Asturies que dalgún día tuvieron con nós, amás de disfrutar de la música de los que perduren y de les xeneraciones nueves que nacieron al amparu d’estos gaiteros”, esplica David González Iglesias, presidente de l’Asociación Cultural ‘Arcángel San Miguel’, coleutivu franquín qu’entama la folixa. L’actividá n’As Pedreiras va principiar a les 13.30 hores col actu institucional y una actuación musical. Darréu, sobre les 14.30 hores, tendrá llugar la ‘Gran churrascada’, a un preciu de 10 euros. El menú tamién inclúi criollos, postre, pan, vinu y refrescos. Mentes, a lo llargo de tol día, los presentes van poder disfrutar d’actuaciones de gaiteros y d’agrupaciones tradicionales.
 
Les persones que quieran disfrutar de la xinta na Festa da Gaita han de mercar los bonos enantes del 5 de xunetu en cualquier de los puntos de venta siguiente: Librería Carlos, Muebles Santi, Bar España, Bar La Plaza, Oficina Mapfre d’A Caridá y El Baúl de Nurita. Tamién pueden dirixise de manera direuta a los direutivos de ‘Arcángel San Miguel’. Otra manera, dende la organización señalen que, en casu de lluvia, la celebración va treslladase al polideportivu del pueblu.