Va respetase'l tiempu ente dosis recomendáu poles farmacéutiques

La Comisión de Salú Pública refugó allargalu pa poner más primeres puestes de vacunes. El martes rexistráronse 144 contaxos.

El Ministeriu de Sanidá y los responsables de Salú Pública de les autonomíes alcordaron ayeri caltener l'intervalu de dosis de vacunes como se describe na Estratexa de Vacunación actual y marquen les fiches téuniques de los preparaos. Asina, la de Pfizer/BioNTech va siguir poniéndose a los 21 díes y la de Moderna, a los 28.

La sesta actualización de la Estratexa confirma tamién que la de Janssen, que se va a entamar a alministrar depués d'algamar el preste de l'Axencia Europea del Medicamentu magar el venceyu esistente con dalgunos casos de trombos al entender que'l balance beneficiu-riesgu recomiéndalo, va destinase al grupu d'edá de 70 a 79 años, mentes qu'AstraZeneca sigue pa los de 60 a 69 años. La prioridá agora ye vacunar a toles persones mayores de 60 años.

Con respeuto a les persones menores de 60 años con una primer dosis y pendientes de recibir la segunda, decidiráse próximamente cuál va ser "en función de la evidencia científica y la disponibilidá de les diferentes vacunes". Refúgase qu'estes persones tengan la posibilidá de recibir AstraZeneca, anque sía de manera voluntaria.

Una muerte

A falta de la espublización de los datos oficiales de la COVID-19, la Conseyería de Salú informó ayeri de 144 casos nuevos –l'actualización contabiliza 6 menos por duplicaos en xornaes previes–. Son 27 más que'l llunes, cuando se detectaron 117 –la revisión de datos amplió la cifra hasta 129 por contaxos non contabilizaos en díes anteriores–.

La tasa de positividá diaria quedó nun 5,04 por cientu tres la realización de 3.588 pruebes de diagnósticu d'infeición activa, inferior a la de la xornada anterior, cuando foi del 5,65 por cientu al facese 2.975 tests. A 7 díes esti porcentaxe yera'l llunes del 5,67 por cientu –ayeri baxó al 5,35 por cientu–.

Ayeri hebo que llamentar la perda d'un home de 72 años. Dende qu'entamó l'andanciu finaron cola enfermedá causada pol coronavirus SARS-CoV-2 un total de 1.938 persones.

Hai hospitalizaos 173 pacientes con confirmación o sospecha de COVID-19, 2 más que'l martes. A ellos hai que sumar los que tán na UCI, un total de 69 per segundu día.

Un biltu n'otra residencia de Xixón

Salú detectó un biltu de coronavirus en residencies de persones mayores, lo qu'implica más de trés casos, cuando la selmana pasada hebo otru. El centru afeutáu ye la Clara Ferrer, tamién en Xixón.

Dieron positivo 2 trabayadores y un internu, toos asintómaticos. Del 13 al 19 d'abril rexistráronse 9 casos en 8 de los 270 centros qu'esisten n'Asturies, asina como 4 finaos con PCR positiva con domiciliu nellos, 3 menos que la selmana anterior.

Llanes torna al riesgu estremu

L'empeoramientu de los datos faen finalmente que Llanes, primer conceyu en salir d'esti nivel, entre en riesgu estremu dos meses depués. Asina, el vienres van activase per 14 díes el zarru perimetral del conceyu y les midíes de l'alerta 4+, como ye'l zarru del interior de los chigres.

Llangréu y Mieres, los otros dos con restricciones de movilidá, tán rexistrando una ameyoramientu que-yos podía permitir dalir del riesgu estremu la selmana qu'entra. Pa consultar los indicadores de tolos conceyos del país y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, viales de la vacuna Comirnaty de Pfizer/BioNTech.