"Va cambiase la llei, pero vamos tar sollertes a cómo se fai", afirma Morilla

|
"Va cambiase la llei, pero vamos tar sollertes a cómo se fai", afirma Morilla

La Plataforma por la Música en Directo en Asturias (PDMA) presentóse esti xueves en sociedá tres meses de trabayu na solombra. Celebra'l cambiu de la llei qu'impedía la música en direuto nos bares, "pero vamos tar sollertes a cómo se fai".

Toli Morilla foi ún de les persones pertenecientes a esti coleutivu, con orixe principal na xixonesa Caja de Músicos y l'Asociación de Músicos de Oviedo, que participaron na presentación d'ayeri celebrada nel salón d'actos del Centru de Cultura Antiguu Institutu, actu nel que tamién tomaron parte Frank Delgado, músicu y xererente del Ca Beleño; el diseñador Paco Currás; y Jorge Otero, líder de Stormy Mondays, amás de Mapi Quintana o Nacho Vegas, ente otros.

Los primeros pasos de la PMDA tuvieron llugar tres los problemes que tuvo'l Ca Beleñu'l branu pasáu col Conceyu d'Uviéu tres l'aplicación por parte municipal de la Llei d'Espectáculos Públicos y Actividades Recreatives, norma que fai illegal la música en direuto en tolos chigres del país, anque los llocales tean insonorizaos y cuenten con llicencia pa música amplificada. La reación de los músicos asturianos foi entamar nel llocal uviedín conciertos en play back pa denunciar la situación y, darréu, comenzar a organizase.

Principió asina un trabayu na solombra qu'agora se fai públicu y que desemboca nesta plataforma pa "proponer y favorecer, protexer y defender el llabor de los músicos", apunta Morilla a Asturies.com. Tamién pa buscar la comprensión vecinos, "porque toos somos vecinos y naide quier molestar a naide". En definitiva, la PMDA céntrase na proteición del emplegu —"non sólo'l de los músicos, sinón tamién el de los hosteleros y el de tola xente rellacionada"—, la industria musical, el turismu y la cultura.

Modificación de la llei

El cambiu llexislativu que se demandaba dende la problemática col Ca Beleño pa impedir que la música en direuto sía illegal nos chigres, yá ta en marcha. Otero confirmaba ayeri que'l direutor xeneral de Xusticia y Interior, Rafael Abril, convidara al coleutivu a comprobar que la tramitación del espediente ye un fechu. Una bona noticia a la que se sumaba la decisión ayeri mesmu del Plenu de Xixón, por unanimidá, de modificar la ordenanza del ruíu pa facilitar la música en direuto nos bares.

Y ye que, anque la llei sía d'ámbitu nacional, los encargaos de cumplila son los conceyos. "Va cambiase la llei, pero vamos tar sollertes a cómo se fai", apunta Morilla, que destaca la necesidá de llendar les posibles interpretaciones de la norma.

Contador Estadistiques