Vázquez Fernández dexa l’alcaldía de Mieres de forma temporal por recomendación médica

|

Los resultados d’una analítica obliguen a Aníbal José Vázquez Fernández a dexar de forma temporal l’alcaldía de Mieres. El médicu recomienda-y reposu, dieta y exerciciu, polo que Manuel Ángel Álvarez Álvarez va quedar al frente de la Casa Conceyu.

El propiu Vázquez Fernández, de 59 años, señaló que la so situación nun ye grave, pero que va tener que camudar de costumes por recomendación médica p’ameyorar el so estáu de salú, afeutáu por una tensión alta y índices tamién altos de colesterol y azúcar. “Va tomase, poro, el tiempu que sía necesariu pa controlar la situación y consolidar les sos rutines nueves col oxetivu de caltener n’orde tolos parámetros venceyaos a la so salú”, anunciaron dende l’Ayuntamientu.

El so sustitutu al frente de la Casa Conceyu va ser el vicealcalde, conceyal de Cultura y Festexos y voceru del grupu d’Izquierda Xunida-Los Verdes d'Asturies, Álvarez Álvarez, persona de confianza del alcalde. Vázquez Fernández espera que los mierenses entiendan la so situación y amosó’l so agradecimientu al so equipu de gobiernu y al so partíu.

Contador Estadistiques