Vázquez Cárcaba ganó’l XIV Concursu de Gaita de Bimenes

El sierense Fernando Vázquez Cárcaba llevó’l XIV Concursu de Gaita de Bimenes tres sumar dos terceros puestos nes ediciones últimes. El so paisanu Álvaro Álvarez Fernández, campeón nel 2012, tuvo que conformase cola segunda plaza.

El polideportivu de Martimporra acoyó la final d’esti concursu mientres la celebración de la XVII Fiesta de la Oficialidá de la Llingua Asturiana, que tuvo llugar el sábadu 6 de xunetu, y contó cola participación de catorce gaiteres y gaiteros mozos qu’interpretaron dos pieces caún. El xuráu, conformáu por José Ramón García Navia, Martín Poladura Berros y Álvaro García Suárez, consideró que’l meyor músicu d’esta edición foi Vázquez Cárcaba, de 19 años d’edá, que nes dos ediciones últimes fixo podium. El gaiteru sierense recibió por ello un troféu, 300 euros de recompensa y un exemplar del 'Cancioneru de la gaita asturiana', obra d'Eugenio Otero Vega, Fonsu Fernández García y Gausón Fernande Gutierri editada y donada pol Muséu del Pueblu d'Asturies.

El ganador l’añu pasáu, Álvarez Fernández, de 18 años, finó en segunda posición, mentes que l’ayerán Diego Lobo Tuñón, tamién de 18 años, foi terceru. Amás de trofeos, dambos tuvieron un premiu de 200 y 100 euros, de manera respeutiva. Otra manera, el Conceyu de Bimenes ta pendiente de concretar la fecha na que celebrar la Xornada Lliteraria prevista pal vienres pasáu que tuvo qu’aplazase al nun poder asistir los ganadores del XVI Concursu de Cuentos pola Oficialidá del Asturianu. L’autora llanisca Isabel Gutiérrez Novo resultó vencedora nesta edición por ‘Hestories cruciaes’.