UXT, SUATEA, CSI y CC OO sofiten la oficialidá nun comunicáu conxuntu

Confirmaron la so presencia na manifestación del sábadu n'Uviéu y denunciaron la marxinación que sufre'l profesoráu de Llingua Asturiana y Gallego-asturiano.

Maxi Fernández Otero, responsable d'Educación d'UXT; Xosé Lluis Colodrón, de la estaya de Llingua Asturiana de SUATEA; Xosé Daniel Rodríguez, voceru de CSI; y Marta Mori, secretaria de Llingua Asturiana de CC OO, encargáronse de presentar esti comunicáu conxuntu de los cuatros sindicatos nel que demanden la oficialidá del asturianu y sofiten la convocatoria del sábadu de la Xunta pola Defensa de la Llingua Asturiana (XDLA), al igual que'l 'Proyectu 2018 pola Oficialidá'. La marcha lleva'l lema ‘L’asturianu llingua oficial ¡agora!’ y va salir al meudía de la Estación del Norte (RENFE).

"Namás la oficialización del asturianu y del gallego-asturiano pue garantizar el cumplimientu del derechu de los escolinos y escolines d’Asturies a conocer el so patrimoniu llingüísticu, amás de ser la única manera de dignificar y regularizar la enseñanza de la llingua propia", aseguren nel documentu, al empar que destaquen que "la oficialidá pon los cimientos d’un edificiu qu’hemos de construyir ente tolos ciudadanos y ciudadanes d’Asturies". Poro, esixen a los grupos políticos que dean un pasu al frente y "asuman la so responsabilidá histórica no que cinca a la sobrevivencia, normalización y tresmisión xeneracional del asturianu y del gallego-asturianu. Ye’l momentu de da-yos a estes variedaes llingüístiques un tratu dignu ya igualitariu, de devolver a los falantes la so dignidá y d’ufri-yos la seguridá xurídica necesaria pa exercer los sos derechos llingüísticos".