UXT considera que los empresarios radicalizaron el so discursu tres les eleiciones del 22 de mayu

Mar Zalamín, secretaria d’Aición Sindical d’UXT, señaló que los empresarios “radicalizáronse” tres el trunfu de la derecha nes eleiciones. Considera que son conscientes de que van aprovechase de recortes “brutales” a los trabayadores.
 
La dirixente sindical de la Unión Xeneral de Trabayadores (UXT) fixo estes declaraciones depués de qu’Alberto González, secretariu xeneral de la Federación Asturiana d'Empresarios (FADE) criticara la postura que caltienen los sindicatos en materia llaboral y dixera que perdieron el norte dende hai muncho tiempu. “Viniéronse arriba y envalentonáronse”, dixo Zalamín, que llamentó qu’hasta una persona que mantenía un perfil más conciliador como González cediera a les postures “más reaccionaries”.
 
“Sacaron el bichu que lleven dientro”, esplicó la secretaria d’Aición Sindical d’UXT, que dixo que son declaraciones que van na llinia de les realizaes pol presidente de la FADE, Severino García Vigón, en conociéndose los resultaos del 22 de mayu. Pal so sindicatu, hai empresarios qu’hasta tán “deseando” que haya que rescatar al Estaú o intervenilu col oxetivu únicu de que s’apliquen esos recortes sociales “brutales” a los trabayadores, algo que Zalamín tachó de “irresponsabilidá”.
 
Sobre l’acusación fecha pol secretariu xeneral de FADE de que los sindicatos perdieran el norte, Zalamín señaló a Europa Press qu’UXT mantién les mesmes postures y posiciones qu'enantes del 22-M, tolo contrario a la patronal, con postures y declaraciones muncho más “agresives” y “amenazantes”.
 
Antonio Pino, secretariu xeneral de CO OO n’Asturies, tamién retrucó a González que “quien perdió’l norte ye él” y reprochó a la patronal asturiana qu’apueste pola mano d’obra intensiva, de cualificación y retribución baxa. Pino tamién apuntó que los sindicatos “a diferencia de la patronal, nun actúen como ‘trileros’ na negociación”, al tiempu que defendió la responsabilidá de los representantes de los trabayadores na firma de convenios coleutivos con “moderación salarial”.