Uviéu, Xixón y Avilés, n’avisu por contaminación

|
Boina de contaminación sobre Salinas 24 de febreru del 2019

Xixón y Uviéu, el domingu, y Avilés, esti llunes, entraron n’avisu por contaminación pola presencia de partícules en suspensión nel aire, una problemática habitual que s’agrava estos díes pola estabilidá atmosférica. Ésta ye la primer vegada que les trés grandes ciudaes del país y la so redolada entren al empar nel nivel 1 del protocolu.

La Conseyería d'Infraestructures, Ordenación del Territoriu y Mediu Ambiente activó ayeri dichu protocolu d'actuación n'episodios de contaminación nes zones d'Uviéu y Xixón tres superar mientres trés díes siguíos el valor mínimu de partícules en suspensión establecíos nel documentu y, acordies cola previsión meteorolóxica recibida, anunciase condiciones de mala ventilación atmosférica. La Coordinadora Ecoloxista d’Asturies yá reclamara un día enantes la so puesta en marcha, al igual que ayeri fixo’l Colectivo Ecologista de Avilés, anque nel casu d’esta zona’l Gobiernu nun lo fadría hasta esta mañana.

Esti nivel d'avisu del protocolu –el segundu de los trés esistentes– inclúi numberoses actuaciones informatives, a les que se suman, amás, delles llimitaciones al tráficu (especialmente'l pesáu y a les operaciones de carga y descarga en zones urbanes) como rebaxar la velocidá máxima nes autovía a 90 quilómetros per hora tolos vehículos, al usu de la calefacción n'edificios públicos, y a obres y actividaes que xeneren contaminación atmosférica. Prohibe tamién la quema de restos vexetales.

No que respeuta a la industria, toles empreses tienen d'estremar los precuros nos procesos susceptibles de xenerar emisiones difuses. Los puertos de Xixón y Avilés deben, pela so parte, amenorgar al mínimu indispensable les operaciones con material susceptible de llevantar polvu.

Coles mesmes, aconséyase acutar l'usu del coche y que les persones con problemes respiratorios o cardiacos nun realicen actividaes qu’esixan esfuerciu físicu nel esterior.

Imaxe de Salinas ayeri, con una visible nube de contaminación enriba de la población y Avilés. Semeya propiedá del Colectivo Ecologista de Avilés.

Contador Estadistiques