Uviéu sal a la cai pa festexar el Martes de Campu

Families y grupos d'amigos uviedinos celebren el Martes de Campu col repartu de 6.000 bollos nel Campu San Francisco. Nesta xornada celébrase la donación fecha por Balesquida Giráldez nel sieglu XIII a los sastres y probes de la ciudá.

Esta donación consistía nun hospital con 10 camas, asina como dellos bienes inmuebles, que se certificó mentes un testamentu nel 1232. La congregación creada llevaría más alantre'l nome de La Balesquida. Dende entós vien celebrándose esta folixa'l martes siguiente a Pentecontés, una xornada con munchu raigañu n'Uviéu.

La fiesta, potenciada dende'l 1930 pola Sociedad Protectora de La Balesquida, saca a la cai a miles d'uviedinos, sobre manera nel Campu San Francisco, anque la xente más mozo axúntense n'otres zones verdes de la ciudá. La fiesta comienza col pregón, pa siguir cola procesión de la Virxe de la Esperanza dende la capiella de La Balesquida hasta la ilesia de San Tirso. Darréu tien llugar la xinta en comuña col repartu del bollu y la botella de vinu.