Uviéu aprueba la oficialización de la toponimia tradicional

|
Uviéu aprueba la oficialización de la toponimia tradicional

La oficialización de la toponimia tradicional d’Uviéu entra nes sos fases últimes tres l’aprobación por parte del Plenu del espediente definitivu de la Xunta Asesora de Toponimia. El dictame va ser espuestu a información pública enantes de pasar al Conseyu de Gobiernu pal so preste definitivu y la so espublización nel BOPA.

L’equipu de gobiernu municipal del PSOE, Somos y Izquierda Xunida (IX) sacó alantre la propuesta colos sos votos, frente a la oposición del Partido Popular (PP) y Ciudadanos. D’esta forma queden aprobaos unos 1.300 términos tradicionales rexistraos tres un trabayu de campu pel conceyu, derogando los castellanizaos, a esceición de dalgunos que queden billingües, como’l de la ciuda: Oviedo/Uviéu.

Esti procesu, sicasí, recibió crítiques del edil de Ciudadanos Luis Antonio Zaragoza, qu’apuntó que “la toponimia tien que facese con rigor científicu. La llingua merez un respetu y esi respetu ha de traducirse nun trabayu seriu, y creemos que nun se fixo nesti casu porque se contó con una persona contratada al traviés d’un contratu menor", que cifró en 9.000 euros. Pela so parte, el popular Gerardo Antuña centró la so crítica en que l’aprobación de los nomes de llugar tradicionales nun ye normalización, sinón cooficialidá

Ignacio Fernández del Páramo, de Somos y conceyal d’Urbanismu y Mediu Ambiente,  encargóse de defender l’espediente y recordó que la Llei d’Usu y Promoción del Bable/Asturianu, qu’afita la recuperación de la toponimia tradicional, foi obra del PP –a propuesta del PAS–. “Atopamos en dos años núcleos inesistentes, llendes trazaes ensin tener en cuenta lo esistente, la topografía…, errores enormes; núcleos dibuxaos fuera de les sos parroquies, sometíos al absurdu… Nós llendamos y agrupamos núcleos conforme a la llei”, señaló al tiempu qu’acusaba a los gobiernos municipales populares anteriores d’esta situación.

Conceyu númberu 60

Tres esti pasu, Uviéu pasará a convertise nel conceyu númberu 60 en recuperar la toponimia tradicional. Enantes han de pasar 30 díes d’información pública del espediente, que darréu pasaría al Conseyu de Gobiernu.

Finalmente, y tres el preste definitivu del Executivu, espublizaráse nel Boletín Oficial del Principáu d’Asturies (BOPA). Ye nesi momentu cuando los nomes de llugar tradicionales d’Uviéu van pasar a ser oficiales, derogando a los castellanos.

Contador Estadistiques