Uviéu 2 - Atlético de Madrid 3

La mañana atragantóse-yos a los xugadores del Uviéu, que volvieron a perder en casa nun partíu nel que'l Mono Burgos, porteru del Atléticu de Madrid, foi la bestia negra del equipu de Quique Marigil. Sicasí, l'equipu procuró sobreponese a tolos factores que tenía en contra y pue dicise que l'Uviéu fizo un de los partíos más curiosos d'esti desastrosu final de temporada. Pela so parte, los Symmachiarii decidieron guardar les pancartes contra la directiva, dándose na grada un ambiente bastante prestosu pa tar como taben les coses. Bien mentalizaos pal partíu, los carbayones nun s'achicaron nin siquiera cuando Correa metió'l primer gol pal Atlético a los siete minutos d'entamar. Tomic empató nel 31, devolviendo-y esperanza a un equipu que nunca nun llegó a tar fuera d'un partíu abiertu, prestosu de ver y con ocasiones a mamplén pero nel que nun tuvo suerte de cara a la portería. Mientres Santamaría y Oli fartáronse a fallar ocasiones de gol, Correas y l'ex-oviedista Carreras metieron les que tuvieron, acabando de remachar al Uviéu nel marcador y na temporada. El gol de penalty de Geni col partíu acabando namás valió pa maquillar el resultáu. A cinco puntos del ascensu y con nueve en xuegu, l'Uviéu entovía tien posibilidaes, pero mui ruines.

Contador Estadistiques