Uviéu va ser sede d’un cursu d’afondamientu llingüísticu p’adultos

La Xunta pola Defensa de la Llingua Asturiana (XDLA) entama un cursu d’afondamientu llingüísticu destináu a persones adultes nel so llocal d'Uviéu. Ésti va principiar el 8 d’abril, con clases tolos llunes y miércoles.

Gracies a esti cursu, de 40 hores de duración, “los alumnos y alumnes van poder afondar nel bon usu del idioma tanto a nivel escritu como oral, asina como nes rellaciones ente llingua y sociedá”, apunten dende la XDLA. El preciu de la matrícula completa ye de 30 euros y pa inscribise nun fai falta titulación nenguna, anque sí hai que tener una conocencia básica de la espresión escrita y oral del idioma.

Nun primer momentu, les clases van celebrase los llunes y los miércoles n’horariu de 19 a 21 hores, anque ye posible realizar cambios según la disponibilidá de la xente matriculao. El cursu va dase en Conceyu Abiertu, llocal asitiáu na cai La Gascona númberu 12, baxu. Les persones interesaes pueden formalizar la so inscripción al traviés de los teléfonos 985.22.95.53 y 645.978.660, o del corréu electrónicu info@exunta.org. Hai que destacar que la XDLA ye una entidá organizadora d’actividaes de formación permanente del profesoráu, poro, esti cursu proporciona creitos homologaos de formación al profesoráu de Primaria y Secundaria a quien lu realice con aprovechamientu.