Uviéu acueye delles actividaes de protesta contra la entrega de los Premios Príncipe de Asturias

El xueves y el vienres tán previstes delles actividaes n’Uviéu como respuesta a la entrega de los Premios Príncipe de Asturias. Un foru social y una mesa redonda van abrir los eventos que van continuar na xornada siguiente con delles marches y una protesta na que van participar persones de tol Estáu desplazaes a Asturies n’autocar. Por último, Dixebra va actuar en La Llosa.

Xente bien conocida del mundu políticu y sindical estatal van tar presentes esta tarde, a partir de les 20.30 hores, nel polideportivu de La Corredoria nel alderique de nome ‘Hacia el poder de la mayoría’ entamáu pol coleutivu ‘Asturies en marcha 22M’. Asina, van tomar la palabra Sabino Cuadra (Amaiur), Lara Hernández (Izquierda Xunida), Juan Carlos Monedero (Podemos), Celia Mayer (Ganemos Madrid) y Juantxo López de Uralde (Equo) nun actu moderáu por Magdalena Martínez Bode (Frente Cívico Somos Mayoría) que va encargase de pesllar Diego Cañamero (SAT). Enantes, a les 18 hores, va tener llugar un foru social entituláu ‘Nuestros derechos son reales’ nel campus del Milán de la Universidá d’Uviéu nel que van tratase al empar en delles charres-alderiques los temes siguientes: renta básica, estáu y conflictu social, economía al serviciu del interés xeneral y en defensa de los servicios públicos, tratáu de llibre comerciu, neolliberalismu y educación, en llucha contra la política migratoria, utres sobre la vivienda pública y social, y el derechu a decidir.

Pa mañana ta prevista la salida de les columnes de la dignidá de Xixón y Avilés (7 hores), La Pola Siero y Llangréu (8.30 hores), y Mieres (9.30 hores) con destín Uviéu pa participar na protesta contra los Premios Príncipe de Asturias, onde los participantes van xuntase xunto coles persones que se treslladen nos autocares previstos procedentes de dellos puntos del Estáu, que principiaron a aportar a Uviéu güei. Tres una xinta popular, a les 17 hores va dar aniciu la concentración na Escandalera, onde va haber presencia, un añu más, d’un bloque soberanista xunitariu.

Les actividaes nun van finar tres l’actu d’entrega de los gallardones, yá que pa pela nueche va tener llugar un conciertu en La Llosa, a partir de les 22 hores, cola participación de Yuyi y José María Carrillo de Gente de Pueblo, Silvidos y Gemidos (Silvia y Gema Fernández, de GPS, Asturiana Mining Company y The Pink Rangers) y Dixebra.  

Gala d’entrega de los Premios Príncipe de Astucias

Esta nueche, a les 22.30 hores, tamién nel polideportivu de La Corredoria, va celebrase la tercer gala d’entrega de los Premios Príncipe de Asturias. Nella ta prevista l’actuación de GPS.