Uviéu anicia’l trámite pa modificar el reglamentu que va garantizar l’usu del asturianu col Conceyu

L’equipu de gobiernu municipal d’Uviéu dio lluz verde la selmana pasada a la modificación del Reglamentu Orgánicu de Gobiernu y Alministración, pendiente d’aprobación en Plenu. Esti cambiu va garantizar l’usu del asturianu col Conceyu.

El derechu a dirixise a les alministraciones na llingua del país ta establecíu pola Llei d’Usu y Promoción del Bable/Asturianu, aprobada nel 1998, norma que nun siempre ye respetada. Asina asocedió nel mes de mayu n’Uviéu, cuando Xurde García Cilleros, vocal de Voluntariáu d’Iniciativa pol Asturianu, nun pudo tramitar un documentu en llingua asturiana nel Rexistru pola negativa d’un funcionariu por tar nesi idioma. Les quexes interpuestes por esti coleutivu énte l’Ayuntamientu y la Procuradoría Xeneral y el treslláu de la situación a los grupos políticos llevó a Izquierda Xunida a mover ficha y a llevar l’asuntu al Plenu, onde PP, Foro y PSOE aprobaron la redaición d’un testu que regulara l’usu del asturianu nel Conceyu.

Al final, esta aición va quedar na modificación del Reglamentu Orgánicu de Gobiernu y Alministración, qu’a partir d’agora va garantizar qu’el Conceyu “tendrá por válido a tolos efeutos l’usu del bable/asturianu nes comunicaciones orales o escrites de los ciudadanos” cola Alministración. “Ye dalgo mui positivo”, asegura Inaciu Galán, presidente d’Iniciativa pol Asturianu, qu’anima a tolos uviedinos a “exercer a esti derechu que yá recueye la Llei dUsu, d’obligáu cumplimientu”. Sicasí, el reglamentu nuevu tovía tien que pasar dellos trámites, yá que la oposición tien hasta’l llunes pa presentar enmiendes. Depués ha de sometese la modificación a dictamen en comisión y llevala a Plenu pa la so aprobación final.

N’opinión de Galán, esti avance na situación del idioma nun conceyu como Uviéu, que nun tien la toponimia tradicional aprobada y nel que l’usu del asturianu ye enforma probe por parte del Ayuntamientu, amuesa que “la protesta sirve pa dalgo”, anque a veces los resultaos “lleguen a llargu plazu”.