Uviéu acueye un alcuentru d'universitarios pa tomar midíes ante los ataques a la educación pública

El vienres y el sábadu, Uviéu va ser sede d’ún de los mayores alcuentros interuniversitarios celebráu nel Estáu. Más d’un centenar de persones de 25 universidaes van debatir sobre la Estratexa Universitaria 2015, ente otres cuestiones.
 
Conseyos d’Estudiantes, delegaciones y activistes estudiantiles tienen prevista la so asistencia nesti foru de dos díes que son una continuidá de los celebraos en Sevilla, en dos ocasiones, y Alicante. L’oxetivu d’esti alcuentru, entamáu pol Conseyu d’Estudiantes de la Universidá d’Uviéu, ye analizar la Estratexa Universitaria 2015, el Plan européu nuevu que busca la privatización encubierta de la universidá pública, asina como tratar los recortes n’educación y organizar les aiciones estudiantiles futures.
 
Rubén Rosón, presidente del Conseyu d’Estudiantes de la Universidá d’Uviéu, va comparecer mañana, a les 11.30 hores, nel Edificiu Históricu de la Universidá xunto a dellos representantes estudiantiles desplazaos a Uviéu pa presentar esti alcuentru y anunciar midíes conxuntes de respuesta a nivel estatal “ante los ataques a la educación y los y les estudiantes”.