Uviéu acueye esti sábadu un conciertu de sofitu a Radio Sele

Skama la Rede, La Tarrancha y La Kuruxa 2.0 participen esti sábadu nun conciertu de sofitu a Radio Sele. La emisora, única dafechu n’asturianu, necesita 6.000 euros pa continuar col so llabor esti añu. Hasta la fecha, yá recaudó 1.500.

“Tamos mui agradecíos pol sofitu que tamos recibiendo d’oyentes y amigos. Préstanos muncho saber que la xente ta con nós”, afirma Xuan Xosé Mariño, direutor de Radio Sele, consciente de que tamos nunos “tiempos difíciles”. La canal, que ta próxima a cumplir los 28 años n’antena, necesita un millón de les antigües pesetes pa poder facer frente a los pagos corrientes, como l’alquiler del llocal, la lluz o la emisión per Internet, ente otros, y “al nun haber onde rascar”, decidió solicitar apoyu económicu a la sociedá asturiana. De momento, dende finales d’ochobre, recaudaren dalgo más de 1.500 euros, una cantidá que s’espera vaya medrando a lo llargo de los meses próximos con iniciatives como’l conciertu del sábadu, “una idea de Miguel Fernandi, que s’encargó de contautar colos grupos y organizalo too”, destaca Mariño.

Asina, el cantante de Skama la Rede y ex comentarista de los partíos del Uviéu en Radio Sele na época na que la emisora uviedina, tres el descensu del equipu a Tercera por impagos, yera la única que radiaba los partíos del conxuntu azul, consiguió axuntar a La Tarrancha y a La Kuruxa 2.0 pa esta actuación que de xuru va dexar pequeña La Antigua Estación, con un aforu d’unes cien persones. El conciertu va principiar a les 20 hores y pa presencialo ye necesario adquirir un bonu d’ayuda de 6 euros.

Ensin emisión pola FM

Radio Sele continúa ensin poder emitir pola FM tres l’amenaza de multa que recibió n’ochobre del 2011 por parte de Telecomunicaciones alegando que l’antena asitiada nel edificiu del llocal yera illegal, lo qu’obligó a los responsables de la canal a continuar cola so programación namái per Internet y a principiar la busca d’un sitiu onde poder asitiar l’antena, ensin ésitu hasta la fecha pol gastu qu’ello supón. Esta circunstancia, y la imposibilidá d’introducir publicidá por nun tener llicencia comercial –llegó a recibila nel 1999, pero Vicente Álvarez Areces anulóla al entrar nel Gobiernu–, son les razones principales que lleven a la emisora con casi 28 años de vida a esta situación complicada.

Les persones interesaes n’ayudar a la radio única qu’emite tola so programación na llingua del país pueden facer aportaciones económiques na cuenta corriente de Caxa Rural siguiente: 3059 0001 18 2366328629. Ésta ta a nome de l’Asociación Cultural Secha.