UPyD refuga'l proyeutu presupuestariu del Gobiernu

El Gobiernu nun va tener, de momento, l’apoyu d’UPyD nes cuentes pal 2013. Ignacio Prendes considera que nun esiste “un proyeutu presupuestariu con unes bases d'ingresos realistes", anque sigue abiertu a la negociación.

El diputáu dexó nidio que "el sí o'l non al impuestu sobre la banca nun va condicionar el sí o'l non d'UPyD” a les cuentes del Gobiernu del Principáu", añadió que’l presupuestu precisa ser "creíble, executable y con unes bases realistes", y apuntó que colos datos que tienen nun-yos paez que los presupuestos cumplan esos requisitos. Prendes señaló que "si nun ye executable va ponese en riesgu'l caltenimientu de los servicios básicos y esenciales –que ye una prioridá pa la formación– y va ponese en riesgu la posibilidá de que sía un presupuestu qu'ayude a la rexeneración económica d'Asturies".

El líder nel país de la formación de Rosa Díez incidió en qu'esti añu namás tán negociaes les cuentes del 2013 col Gobiernu d'Asturies y reconoz qu'hasta agora, colos datos que tienen na mano, pue retayase más nel gastu corriente. "La nuesa prioridá yá la dexamos clara y ye más inversión social, la defensa de los servicios básicos; les polítiques d'innnovación y desarrollu; y l'apoyu al texíu empresarial y a los entamadores. Prendes fixo un llamáu a la responsabilidá y confía en que se pueda algamar un alcuerdu pa qu'Asturies tenga un presupuestu nel 2013, pero recuerda qu'eso "va esixir dalgún cambiu del borrador que manexa l'Executivu asturianu nesti momentu".

El votu d’UPyD ye necesario pal PSOE, xunto colos d’Izquierda Xunida, pa sacar alantre les cuentes del 2013. Una de les condiciones que punxo enriba de la mesa la coalición ye l’impuestu a la banca, dalgo que’l partíu del Gobiernu ta dispuesto a apoyar pa desbloquiar les cuentes.