Universidá d’Uviéu y Academia de la Llingua Asturiana afiten la so collaboración con un conveniu nuevu

|
Santiago García Granda y Xosé Antón González Riaño firma conveniu Universidá d'Uviéu y ALLA

Santiago García Granda y Xosé Antón González Riaño roblaron un conveniu de collaboración nuevu que vien a afitar les rellaiciones ente dambes instituciones. La creación de beques d’investigación conxuntes y l’asesoramientu llingüísticu a la Universidá d'Uviéu pola ALLA son dalgunos de los puntos que recueye'l documentu.

L'oxetivu d'esti alcuerdu ye la promoción, l'espardimientu y la normalización llingüística de la llingua asturiana dientro de la institución universitaria al traviés d'un marcu de cooperación qu'amplia la collaboración yá existente ente les dos entidaes. Éstes venía faciéndose faciendo bien al traviés de convenios específicos pal desarrollu d'actividaes conxuntes, como la Universidá Asturiana de Branu (UABRA) o la coedición de llibros y revistes, o bien per soporte presupuestariu a delles iniciatives de l'Academia de la Llingua Asturiana (ALLA) feches nel contestu universitariu, como les Xornaes Internacionales d'Estudiu.

“Col conveniu robláu güei –por ayeri– búscase mover les rellaciones institucionales pal desendolcu en xunto de tolo rellacionao cola dignificación de la cultura y la llingua asturiana, cola so enseñanza y espardimientu popular, acordies a la Llei 1/1998, de 23 de marzu, d'Usu y Promoción del Bable/Asturianu”, apunten dende la Universidá d’Uviéu, destacando sobre manera ente otros munchos aspeutos l’emplegu de l’ALLA como centru investigador al traviés de la creación de beques en xunto pa la investigación sobre aspeutos concretos de la llingua y cultura d'Asturies. Tamién esta institución va dar asesoramientu llingüísticu a la Universidá “nel desendolcu de los programes de promoción, espardimientu y normalización llingüística nel ámbitu universitariu faciendo traducciones y poniendo cursos de formación continua d'asturianu mesmo pal Personal d'Alministración y Servicios que pal profesoráu de la Universidá, ente otres acciones”.

Otros puntos del conveniu, amás de los yá citaos, son la continuidá de l’ALLA como centru de práutiques d’estudiantes universitarios, l’entamu conxuntu d’eventos, el diseñu d’esposiciones de distintu calter, la coedición d’obres emblemátiques y concretes rellacionaes col ámbitu científicu de la filoloxía asturiana y la promoción d’estudios científicos de calter estratéxicu pa la llingua y la cultura d'Asturies.

Na semeya, el rector García Granda y Xosé Antón González Riaño, presidente de l'ALLA, nel momentu de roblar el conveniu ente dambes instituciones.

Contador Estadistiques