Unión d'Hidrocantábrico y Caja Madrid nes enerxíes renovables

La compañía eléctrica asturiana Hidrocantábrico y la entidá financiera Caja Madrid tan entamando un nuevu camín de collaboración nel espardimientu del negociu de les enerxíes verdes. Les dos empreses tan acabantes de crear la sociedá Genesa (Xeneraciones Especiales) na que van enxertase los activos de l'antigua Gamesa y de Sinae. La nueva empresa va tar participada al 80% por HC y el restu va ser propiedá de Caja Madrid. La sede de la compañía nueva va asitiase n'Uviéu.

Genesa tien previsto invertir 700 millones d'euros hasta algamar una potencia nos sos parques eólicos de 850 MW de potencia. Xunta los parques eólicos l'ámbitu de negociu tamién llega a centrales minihidráuliques, tratamientu de purines, biomasa y instalaciones de coxeneración. Anguaño la empresa ta construyendo trés parques eólicos n'Asturies. L'espardimientu d'HC ente les enerxies renovables respuende a la fuercia que tan garrando estes enerxíes que cada día son más rentables. l'altu preciu y l'agotamientu del petroleu ye la primer causa que tan emburriando a eléctriques e inversores a camudar el modelu de negociu y les fontes d'enerxía. Según los analistes solo no referente a la enerxía eólica nel Estáu va movese nos próximos años un negociu alrodiu los 5.800 millones d'euros.