Unidá y la Coordinadora Ecoloxista critiquen la Estratexa enerxética del Gobiernu asturianu

L'aprobación nel pasáu Conseyu de Gobiernu d'Asturies de la "Estratexa Enerxética del Principáu d'Asturies 2007-2012" llevantó les crítiques de la Coordinadora Ecoloxista d'Asturies y de la coalición política "Unidá". Si pal colectivu ecoloxista'l Plan supón "l'amuesa de la ceguera d'un gobiernu que quier convertinos en monocultivu enerxéticu primariu", pa la coalición qu'axunta a IAS, AA y los Verdes - Grupu Verde, el plan supón un "güelpe" al mediuambiente asturianu.

El plan prevé la duplicación de la capacidá de xeneración eléctrica d'Asturies, una autonomía, ello cuando Asturies "yá esporta anguaño más de la metada de la electricidá que produz" según sorraya'l candidatu d'Unidá Ignaciu Llope, que calificó la Estratexa de "plasmación per escrito del escenariu más desarrollista, estalinista y destructor de recursos naturales que podía concebise p'Asturies". La Coordinadora Ecoloxista, que tamién condena que la Estratexa espeye un escenariu de dupicación de la potencia asitiada, sorraya como esi escedente de producción va precisar de "nueves llinies d'alta tensión y nueves subcentrales colos sos correspondientes impactos ambientales y sanitarios causaos pola electropolución".

Los ecoloxistes critiquen especialmente que se caltengan les "obsoletes y contaminantes centrales térmiques de carbón" o la "peligrosa y innecesaria regasificadora a menos de 2 km. de miles de viviendes de Carreño y Xixón, cuando Asturies yá ta perfectamente conectada coles dos regasificadores existentes". Xunto con esto, dambes organizaciones sorrayen que l'aumentu de xeneración al traviés de renovables, amás de ser curtiu, va encontase mayormente na creación de parques eólicos nel occidente asturianu, que va "saturase" d'estes instalaciones, al paecer d'Ignaciu Llope.

D'otra manera, faciendo una valoración política, el candidatu d'Unidá sorraya que "esti plan, aprobáu nos caberos díes de la presente llexislatura col preste de los conseyeros d'IX-BA, va tener validez hasta 2012, polo que va hipotecar tol cursu de la viniente lexislatura" dalgo que pa Ignaciu Llope "fai papel moyao de toles promeses electorales sobre desenvolvimientu sustentable y ecoloxismu que vien faciendo'l candidatu d'IX Jesús Iglesias".